Магілёўская міліцыя працягне праверку спробы камунальнікаў трапіць у кватэру журналіста

Раней па заяве журналіста ўчастковым інспектар Данькоў ужо ладзіў праверку інцыдэнту 13 лістапада 2015 года, калі два супрацоўнікі міліцыі і пяць камунальнікаў з арганізацыі “Камунальнік МК” незаконна спрабавалі трапіць у кватэру Ігара Барысава нібыта з мэтай правядзення “сезоннага агляду”.

Тады сям’я журналіста адмовілася пусціць візітораў у сваю кватэру — Барысавы палічылі, што падстаў для правядзення агляду няма. Артыкул 29 Канстытуцыі Рэспублікі Беларусь гарантуе грамадзянам права на недатыкальнасць жылля, ніякіх парушэнняў Жыллёвага кодэкса сям’я журналіста не дапускала, сям’я своечасова плаціць за камунальныя паслугі.

Участковы інспектар Данькоў, як мяркуе журналіст, павярхоўна і няякасна паставіўся да правядзення праверкі, хаця і праводзіў яе двойчы (пасля скаргі Барысава ў пракуратуру). На падставе праверкі міліцыя адмовіла ва ўзбуджэнні крымінальнай справы.

 Ігар Барысаў не пагадзіўся з высновамі магілёўскіх міліцыянтаў. З вялікімі цяжкасцямі ён здолеў азнаёміцца з матэрыяламі праведзенай праверкі і па выніках пакінуў скаргу ў Кнізе заўваг і прапаноў Кастрычніцкага РАУС. Рэакцыяй на скаргу і стала абяцанне хадайнічаць перад пракуратурай пра правядзенне дадатковай праверкі.

Зараз журналіст будзе чакаць афіцыйнага паведамлення пра дадатковую праверку. Ён мяркуе, што міліцыянты могуць “не заўважыць” яўных прыкметаў незаконных дзеянняў, бо ў іх фігуравалі калегі.