Івацэвіцкі фрылансер атрымаў папярэджанне ад мясцовай пракуратуры (ДАКУМЕНТ)

Як высветлілася з уручанага фрылансеру дакумента, раённая пракуратура ладзіла праверку паводле інфармацыі Бярозаўскага РАУС і прыйшла да высновы, што Павел Дайлід парушыў Закон РБ “Аб сродках масавай інфармацыі”. Гаворка ідзе пра змешчаную на інтэрнэт-старонцы Радыё “Свабода” аўтарскую публікацыю “Бунт у Спораве: сяляне патрабуюць вярнуць ім возера”.   

Як распавёў службе маніторынгу ГА “Беларуская асацыяцыя журналістаў” сам Дайлід, яму паказалі раздрукоўкі згаданага артыкулу, а таксама тэкст афіцыйнага папярэджання за подпісам намесніка пракурора Івацэвіцкага раёна Сяргея Жуковіча.

“Усё было падрыхтавана, і я асабліва не ўпіраўся, бо, калі існуе замова папярэдзіць – вынік прадказальны”, – паведаміў Павел Дайлід. Ён дадаў, што не мае намеру абскарджваць папярэджанне, каб не губляць часу.

“Той матэрыял пра Спораўскае возера выклікаў шырокі рэзананс. Я лічу, што атрымаць пракурорскае папярэджанне за яго – ушанаванне маёй працы, бо і такім чынам улады заўважаюць незалежную журналістыку”, – жартуе івацэвіцкі журналіст.