Суд Ленінскага раёна Магілёва адхіліў скаргу журналіста

У сваім пазове ў суд Буракоў не пагаджаўся з рашэннем камісій пра тое, што ён “прыдатны з абмежаваннямі” да прызыву на вайсковую службу, бо мае захворванне каленных суставаў, пры якім прадугледжваецца вызваленне ад вайсковай службы ў мірны час.

Журналіст прасіў суд адмяніць рашэнні камісій як неабгрунтаваныя і незаконныя, а таксама прызнаць яго медычны статус “нягодны да тэрміновай службы ў мірны час” альбо прызначыць для гэтага адпаведную медыцынскую экспертызу з прыцягненнем спецыялістаў.

Буракоў сцвярджае, што рашэнне пра яго прызыў на вайсковую службу было прынята з парушэннем належных працэдур, без уліку сапраўднага стану яго здароўя. Таксама Аляксандр Буракоў падкрэслівае, што не хоча прымаць прысягу ў беларускім войску праз свае палітычныя перакананні, бо не лічыць Аляксандра Лукашэнку легітымным кіраўніком краіны.

Суддзя Алена Дыбленка не прыняла да ўвагі довадаў Буракова і адмовілася задаволіць скаргу. Па меркаванні суддзі, рашэнне прызыўной камісіі слушнае, і ён прыдатны да службы ў войску.

Сам журналіст не згодны з такой высновай і будзе падаваць касацыйную скаргу на яго рашэнне, бо для яго гэта справа прынцыпу. Па словах Буракова, яго хвароба пастаянна прагрэсуе, і абедзве вайсковыя часткі, у якія ён праходзіў адбор, нават далі пісьмовыя адмовы ад яго прызыву.

Праваабаронца Барыс Бухель таксама лічыць, што рашэнне пра прызыў Буракова на вайсковую службу цалкам неабгрунтаванае. Ён раіць журналісту адстойваць свае правы ў вышэйшых інстанцыях.

Магілёўскі журналіст-фрылансер Аляксандр Буракоў піша матэрыялы на праваабарончыя тэмы, у свой час быў рэдактарам папулярнага магілёўскага анлайн-часопіса “Moloko”.

Сумнавядомы магілёўскі інтэрнэт-рэсурс ВоскресIN­FO, які неаднаразова змяшчаў на сваіх старонках паклёпніцкія матэрыялы пра мясцовых грамадскіх актывістаў і журналістаў і ўладальнікаў якога чамусьці ніяк не могуць знайсці магілёўскія ахоўнікі правапарадку, прысвяціў Буракову адмысловы артыкул. У ім артыкуле журналіста выстаўляюць “ухілістам”, і на яго адрас выказваюцца прыхаваныя пагрозы.