У брэсцкай філіі ГА «БАЖ» адбыўся майстар-клас з удзелам вядомага блогера Ігара Лосіка

Ігар Лосік (@belamova) лічыцца адным з самых папулярных блогераў у беларускім сегменце сацыяльнай сеткі Twit­ter. Акрамя таго, ён паспяхова прасоўвае у інтэрнэт-прасторы “Радыё Свабода”: менавіта на прыкладзе прысутнасці ў сацыяльных сетках гэтага традыцыйнага медыя брэсцкія сябры ГА “Беларуская асацыяцыя журналістаў” і прадстаўнікі мясцовых выданняў пазнаёміліся з асаблівасцямі такой працы.

Паводле меркавання Ігара Лосіка, галоўным крытэрыям папулярнасці СМІ зараз з’яўляецца ня толькі наклад альбо колькасць наведванняў адмысловай інтэрнэт-старонкі, але і прысутнасць на ўсіх анлайн-платформах, улічваючы сацыяльныя сеткі. Бо цяперашнім трэндам з’яўляецца тое, што пра змест публікацый у тым ці іншым медыя шмат хто з інтэрнэт-карыстальнікаў даведваюцца менавіта праз сацыяльныя сеткі.

Больш таго, прагноз на бліжэйшую перспектыву сведчыць, што гэтая тэндэнцыя будзе працягвацца: трафік традыцыйных СМІ чакае далейшае скарачэнне, а цяперашнія інфармацыйныя сайты пачнуць “убудоўвацца” у сацыяльныя сеткі. Пры гэтым адбудзецца атамізацыя медыяпрасторы і дамінаванне буйных анлайн-агрэгатараў.

Удзельнікі майстар-класу таксама даведаліся, як працаваць з мультымедынымі прыладамі ў спалучэнні з традыцыйнымі тэкстамі, каб зрабіць навіну больш заўважнай для анлайн-аудыторыі.

Вельмі карысным былі парады, якія тычыліся спосабу і нават часу размяшчэння некаторых паведамленняў у сацыяльных сетках, каб дамагчыся найбольшага эфекту.

Брэсцкія сябры ГА «БАЖ» з вялікай цікавасцю успрымалі агучаную інфармацыю, задавалі шмат пытанняў і  казалі пра тое, што некаторыя карысныя парады абавязкова возьмуць “на узбраенне” для прасоўвання мясцовых выданняў.