Урад: акрэдытацыя дабро, якое журналісты не заўважаюць

Менавіта так беларускі ўрад адрэагаваў на скаргу гомельскай журналісткі Ларысы Шчыраковай у Камітэт ААН па правах чалавека, піша «Гомельская вясна».

Характэрным для дадзенага кейса з’яўляецца той факт, што журналістка вычарпала ўсе ўнутраныя сродкі прававой абароны, уключаючы Генеральную пракуратуру. Тым самым, яна пазбавіла афіцыйны Менск на міжнародным узроўні круціць заезджаную пласцінку аб «невычарпанні ўсіх унутраных сродкаў прававой абароны».

Юрыст Беларускай асацыацыі журналістаў (БАЖ) Леанід Судаленка, які дапамагае журналістцы абараняць правы на міжнародным узроўні падкрэслівае, што дадзены кейс з’яўляецца прамым сведчаннем таго, як у адсутнасць прававой аргументацыі ў ход ідуць любыя аргументы, тыпу «чалавек абавязаны», «ніхто не можа карыстацца прывілеямі» і г.д.

Ён нагадаў, што раней у аналагічным аб акрэдытацыі беларускую справу журналісткі «Марына Коктыш супраць Беларусі» (№1985 / 2010) Камітэт нагадаў, што менавіта дзяржава павінна прадстаўляць прававое абгрунтаванне любога абмежавання, усталяванага на ажыццяўленне права свабоднага выказвання меркаванняў.

У справе журналісткі Ларысы Шчыраковай дадзенае патрабаванне не выканана.