Глыбоцкія журналісты-фрылансеры Таццяна Смоткіна і Зміцер Лупач атрымалі позвы ў міліцыю

Як мяркуюць журналісты, справу на іх завялі за матэрыялы, якія выйшлі на Радыё Рацыя і незалежным тэлеканале “Белсат” пра закрыццё аддзялення “Беларусбанка” (ашчаднай касы) і іншыя праблемы жыхароў аграгарадка Язна Мёрскага раёна, а таксама змяшчаецца адкрыты ліст жыхароў Язна да Лукашэнкі.

У той жа дзень, калі журналісты ездзілі ў аграгарадок Язна размаўляць з жыхарамі, увечары да людзей наведалася і міліцыя. Па словах журналістаў-фрылансераў, яны чакалі такой рэакцыі ўладаў. Ім даўна ўжо зразумела, што за вострыя сацыяльныя сюжэты ўлада карае незалежных журналістаў. Але яны не збіраюцца займацца самацэнзурай, а будуць і надалей асвятляць у сваіх матэрыялах сацыяльныя праблемы людзей.

Раней глыбоцкія журналісты ўжо атрымлівалі непісьменна складзеныя позвы. Тады яны звярталі ўвагу міліцыянтаў на памылкі, але, як аказалася, выпраўленая толькі адна. Слова “повестка” напісана правільна замест ранейшага “повеска”, астатнія памылкі так і засталіся на бланках.