«Стаяць на сваім»: у Мінску пройдзе кінафестываль WATCH DOCS Belarus Відэа

У праграме фестываля 15 кінастужак, якія пакажуць у кінатэатры “Мір” і на пляцоўках ОК16, PR3.

Фестываль, які з’явіўся з мэтай гаварыць пра правы чалавека на мове асабістых і аўтарскіх гісторый, прадстаўляе фільмы з розных куткоў свету. Героеў кінастужак – сапёра-дабраахаотніка з пасляваеннага Іраку, зняволенных жанчын беларускай турмы, шведскую рэп-спявачку Сільвану, вулічных музыкаў Буркіна-Фасо і Нобелеўскага лаурэата прэміі міра – аб’ядноўвае слоган фестываля “Стаяць на сваім”. Моц і слабасць такой пазіцыі фестываль прапаноўвае “разглядзець” як на саміх кінапраглядах, так і падчас спецыяльных мерапрыемстваў з удзелам экспертаў.

Тэма фестываля раскрывацца праз некалькі ракурсаў:

• Стаяць на сваім: Невуцтва і ксенафобія

13 снежня ў 18:30 у кінатэатры «Мір» фестываль адкрые фільм “Белы свет вачыма Даліборэка” – рэдкі і вельмі паспяховы прыклад дакументальнай камедыі. Чэшскі рэжысёр Віт Клусак адпраўляе гледача ў замкнутае кола роздумаў пра тое, якім жудасным можа быць нацызм у сваёй жывучасці, і які нацызм смешны, калі пабачыць рэальнае жыццё тых, у чыі галовы ён пракрадаецца.

• Стаяць на сваім: Хлусня, нахабная хлусня

На аснове фільма Максіма Паздароўкіна «Наш новы прэзідент» адбудзецца дыскусія пра фэйкі ў СМІ, постпраўду, прапаганду і пра інфармацыю, якая робіць нас яшчэ больш уразлівымі. Партнёр і месца правядзення прагляду — Press Club Belarus.

• Стаяць на сваім: Глеба, якой няма пад нагамі

Размаўляем адкрыта на тэмы рэсацыялізацыі былых асуджаных, эмацыйнага выгарання і дэпрэсіі, інтэграцыі людзей са слабым слыхам.

• Стаяць на сваім: Захоўваючы здаровы сэнс

Фільмы «Мужчына, які рамантуе жанчын» — гісторыя пра вайну, у якой жанчыны становяцца зброяй і полем бою, і “Трап у будучыню” – сучасная адысея пра выратаванне тапельцаў у моры паспяховай абыякавасці. З рэжысёрам апошняга фільма, Рэнэ Хэйзкампам, гледачы абмяркуюць адносіны еўрапейцаў і беларусаў да імігрантаў.

Усе фільмы транслююцца з субтытрамі (на рускай ці беларускай мове), таму дасяжныя для людзей з абмежаваннямі слыху.

Праваабарончая навінка 2018 года — антыпрэмія “WATCH DOCS пазначыў”

Да 10 снежня арганізатары фестываля збіраюць намінантаў, якія знервавалі і засмуцілі беларусаў на працягу года. Даведацца пра крытэры і пакінуць сваю прапанову можна на сайце WATCH DOCS. Каманда фестываля сфармуе  спіс прэтэндэнтаў, а гледачам можна будзе прагаласаваць за шорт-ліст падчас праглядаў кіно. Пераможцы будуць абвешчаны падчас урачыстага закрыцця фестываля.

За вялікай праграмай і навінамі сачыце на сайце Фестываля ці ў сацыяльных сетках.

Уваход на ўсе прагляды свабодны. Калі хочацаа забраніраваць месца, глядзі старонку праекта на Talaka.by.