Журналіста Рамана Васюковіча будуць судзіць за ўвоз кнігі “Беларускі Данбас” 12 сакавіка

Кнігі і ноўтбук накіравалі на экспертызу на экстрэмізм. У лютым Васюковічу паведамілі, што камп’ютар яму гатовыя вярнуць, а вось у кнізе нібыта знайшлі прыкметы экстрэмізму. У лютым супраць журналіста склалі адміністрацыйны пратакол ч. 1 арт. 17.11 КаАП («Распаўсюджванне або перавозка інфармацыйнай прадукцыі, якая змяшчае заклікі да экстрэмісцкай дзейнасці»), які накіравалі ў суд.

У пратаколе адзначаецца, што, згодна з экспертным заключэннем Мінскай абласной экспертнай камісіі па ацэнцы інфармацыйнай прадукцыі, кніга «Беларускі Данбас» мае «прыкметы праявы экстрэмізму».

«Беларускі Данбас» — гэта журналісцкае даследаванне пра беларусаў на вайне, ролі спецслужбаў, а таксама пра тое, як гэты канфлікт паўплываў на Беларусь. Кніга была выдадзены летась ва ўкраінскім выдавецтве «Фоліо».

19 лютага 2021 года ў амбасадзе Украіны ў Мінску прайшла прэзентацыя кнігі «Беларускі Данбас», на якой прысутнічаў амбасадар Украіны Ігар Кізім.

Абсурднасць справы заключаецца ў двух момантах:

• Ні на “экспертызу”, ні ў суд не выклікалі галоўны зацікаўлены бок — аўтараў кнігі, журналістаў Кацярыну Андрэеву (яна за кратамі) і Ігара Ільяша. Атрымліваецца, у кнізе “знайшлі экстрэмізм”, а аўтараў нават не праінфармавалі пра гэта.

• З моманту затрымання ў мінскім аэрапорце Рамана Васюковіча прайшло ўжо амаль 3 месяцы, то бок тэрмін прыцягнення да адміністрацыйнай адказнасці даўно выйшаў.

Нягледзячы на гэта 12 сакавіка а 17:00 справу будзе разглядаць суд Кастрычніцкага раёна Мінска а 17:00.

Васюковічу пагражае да 50 базавых велічыняў штрафу (1 450 рублёў).