Палітвязня і супрацоўніка радыёстанцыі «Гомель» Аляксея Кругляка асудзілі ў суботу да года калоніі

Справу разглядаў суддзя Віктар Казачок.

Аляксея Кругляка затрымалі 2 снежня 2021 года і да суда ўтрымлівалі ў СІЗА №3 Гомеля.

Паводле абвінавачання, Аляксей Кругляк, знаходзячыся на працоўным месцы на Гомельскім тэлебачанні, са свайго тэлефону ў прафесійным закрытым чаце 12 жніўня 2020 года напісаў некалькі паведамленняў, якія тычацца палітычнай сітуацыі ў краіне пасля выбараў. Ён убачыў, які гвалт і агрэсія былі ў Менску і іншых гарадах краіны над мірнымі жыхарамі, якія выказвалі сваё стаўленне да выбараў, паведамляе ПЦ «Вясна».

На эмоцыях Аляксей прапанаваў выходзіць на вуліцы ў Гомелі, ладзіць маршы, станавіцца ў ланцугі. Сам гатовы быў удзельнічаць у любых актыўных дзеяннях, нават надзець белую вопратку і далучыцца да жанчын з кветкамі, калі будзе неабходна, то і ў сукенку. Гэтыя паведамленні расцанілі як заклікі да несанкцыянаваных мітынгаў і дзеянняў, якія груба парушаюць грамадскі парадак, а яго –  арганізатарам гэтых дзеянняў.

Крымінальную справу завялі толькі праз год, восенню 2021 года, калі хтосьці з гэтага закрытага чата зліў інфармацыю, якая ўтрымлівала заклікі, у праўладны чат «Жоўтыя злівы».

Аляксей да таго часу пра гэтыя паведамленні ўвогуле забыўся і своечасова іх не выдаліў. Пасля апублікавання ён спалохаўся, запісаў і выклаў у інтэрнэт «пакаяльнае» відэа, дзе ён ад усяго адхрышчваўся ў надзеі, што яго не затрымаюць. Але было позна…

Напачатку следства Кругляк сваю віну прызнаваў часткова, прызнаваў, што пісаў ён, але нікуды, нікога не заклікаў, а «проста хацеў выйсці прагуляцца ў кампаніі і паглядзець абстаноўку ў горадзе».

А на судовым працэсе Кругляк пагадзіўся даваць паказанні і тады прадстаўнік абвінавачання і суддзя дамагліся ад яго поўнага прызнання віны.

Аляксей цалкам прызнаў віну, усвядоміў, каецца, хоча да маці, жонкі і дачкі.

Сведкі, якія выступілі на працэсе, пацвердзілі яго прысутнасць і нік у службовым чаце.

Таксама ў судзе былі прагледжаныя крыншоты паведамленняў, галасавых паведамленняў і ягонае «пакаяльнае» відэа.

Пракурор запрасіў для абвінавачанага адзін год пазбаўлення волі ў калоніі агульнага рэжыму.

У сваім  апошнім слове Аляксей, добра пастаўленым дыктарскім голасам агучыў, што згодны на ўсё, нават стаць «рупарам прапаганды», працаваць не пакладаючы рук на карысць краіны і рэжыму, абы не адпраўлялі ў калонію, а адпусцілі дадому да сям’і. Гэтак жа за яго вельмі перажывалі маці і жонка і прысутныя на працэсе, крыху перапалоханыя з‑за сітуацыі са знаёмым.

Суддзя Віктар Казачок прызначыў Кругляку пакаранне ў выглядзе пазбаўлення волі тэрмінам на адзін год у калоніі агульнага рэжыму, за выняткам часу праведзенага пад следствам у СІЗА.