Рэдактару глыбоцкай раёнкі, які піша абразлівыя артыкулы пра апазіцыю і Еўропу, уручылі ўзнагароду

Галоўнага рэдактара ​​дзяржаўнай раённай газеты «Веснік Глыбоччыны» Андрэя Панкрата ўзнагародзілі «за лепшы аналітычны матэрыял» на конкурсе для дзяржаўнай прэсы «Залатая Ліцера».

Андрэй Панкрат на ўручэнні «Залатой Ліцеры». Фота: vg-gazeta.by

Аўтарскую калонку, у якой Андрэй Панкрат абразліва і з выкарыстаннем мовы варожасці выказваецца пра апанентаў беларускага рэжыму, краіны Захаду і Украіну, прадставілі як аўтарскае ўспрыманне бягучых падзей. Паводле журы, яго тэксты закранаюць нацыянальныя інтарэсы і бяспеку Беларусі, тлумачаць складаныя палітычныя і геапалітычныя расклады простымі словамі.  

Цырымонія ўзнагароджання пераможцаў і лаўрэатаў чарговага конкурсу для дзяржаўнай прэсы «Залатая Ліцера», сярод якіх быў Андрэй Панкрат, адбылася ў межах Форуму медыйнай супольнасці, які праходзіў 28 траўня ў Магілёве. «Журы ацэньвала працы паводле такіх крытэрыяў, як актуальнасць, глыбіня аналізу, дакладнасць інфармацыі і творчы падыход», — піша сайт «Весніка Глыбоччыны».

За якія публікацыі Андрэй Панкрат атрымаў узнагароду ад Міністэрства інфармацыі?

У сваім праекце «Меркаванне» ў артыкуле пад назвай «Што чакае хрысціянства Украіны?» галоўрэд разважае пра раскол царквы ва Украіне, паганства, выкарыстоўвае мову варожасці і вінаваціць кіраўніцтва Украіны.

Піша ён у абразлівай форме і пра жыццё ў Еўропе. Пасыл яго артыкула «Чаму аднымі лозунгамі сыты не будзеш?» такі, што апазіцыя задурманьвае галовы беларусам тым, што Беларусь павінна імкнуцца ў Еўразвяз. І на прыкладзе Грэцыі апісвае, чаму гэтая дрэнная ідэя.

Таксама не абыходзіць Панкрат сваёй увагай Святлану Ціханоўскую і людзей, якія з’ехалі з Беларусі па палітычных матывах. Гэтай тэме ў сваім праекце ён надаў асаблівую ўвагу і напісаў некалькі матэрыялаў.

Артыкул, пад назвай «Аб выступе Ціханоўскай у Еўрапарламенце», ён пачаў словамі: «Ціханоўская выступіла перад дэпутатамі Еўрапарламента. Трэсла бчб-анучай і ўкленчана звярталася да сваіх гаспадароў, заклікаючы прыдумаць нейкія механізмы, якія створаць хоць нейкую бачнасць працы па інтэграцыі Беларусі ў Еўрапейскі саюз».

У артыкуле пра з’ехаўшых «Які план адпрацоўваюць беглыя экстрэмісты?» рэдактар глыбоцкай раённай газеты распавядае пра «лялькаводаў» апазіцыі, гранты, саму апазіцыю ён называе «экстрэмістамі, якія пасуцца на амерыканска-еўрапейскім лузе».

А ў гэтым матэрыяле пад назвай «Пра што папярэджваў Платон», зневажае незалежных журналістаў  і называе незалежныя СМІ «опа-рэсурсамі».

Увогуле падобных матэрыялаў у аўтарскім праекце Андрэя Панкрата назбіраецца каля дзясятка. Усе назвы яго артыкулаў вельмі красамоўныя: «Што пужае беглых», «Яны хочуць здаць краіну, каб тусавацца прыгожа… Для чаго Беларусі новая ваенная дактрына», «Прадам Беларусь за 500 даляраў», «Для іх гэта «победобесие», а для нас нагода гонару» ды іншыя.