Журналістку Алену Цімашчук уключылі ў «спіс тэрарыстаў», які складае КДБ

Журналістка з Брэста асуджана паводле трох артыкулаў Крымінальнага кодэкса за дыскрэдытацыю Рэспублікі Беларусь (артыкул 369–1), за распальванне варожасці ці варажнечы (частка 3 артыкула 130), за ўдзел у экстрэмісцкім фарміраванні (частка 3 артыкула 361–1).

Журналістка Алена Цімашчук. Фота: з асабістай старонкі ў Face­book

Пералік гэтых артыкулаў згаданы і ў абноўленым «тэрарыстычным спісе» КДБ, дзе 3 верасня з’явілася імя і прозвішча Алены Цімашчук, піша «Берасцейская вясна».

10 дзён таму, 23 жніўня, па рашэнні Міністэрства унутраных спраў жанчыну ўнеслі ў спіс асобаў, «схільных да экстрэмісцкай дзейнасці». У гэтым спісе пазначана, што Цімашчук ужо «адбывае пакаранне».

Сёлета 3 чэрвеня суддзя Брэсцкага абласнога суда Дзмітрый Карасінскі асудзіў былую журналістку  да 5 гадоў пазбаўлення волі з адбыццём у папраўчай калоніі і прызначыў штраф памерам 1150 базавых велічынь (гэта 46 000 рублёў ці амаль 14 000 долараў). 16 жніўня ў Вярхоўным суддзе адбыўся разгляд апеляцыйнай скаргі журналісткі, але яго вынік невядомы.

Алена Цімашчук працавала ў абласной тэлерадыёкампаніі «Брэст». У якасці фрылансера супрацоўнічала з рэгіянальнымі выданнямі «Вечерний Брест», «Брестский курьер», «Брестская газета», інтэрнэт-выданнем «Виртуальный Брест», а таксама «Брестским зелёным порталом».

Сёлета 12 чэрвеня праўладны Telegram-канал «Жёлтые сливы» змясціў пра яе абразлівы допіс, дзе сцвярджалася, што Алена Цімашчук «действительно работала в гос СМИ и все у нее было хорошо», але трапіла «в чат-бот экстремистского формирования «Радыё Свабода», а оттуда и в обучающую программу фонда «Вацлава Гавела». Таму ёсць падставы меркаваць, што за гэта дзяўчыну абвінавацілі ва ўдзеле ў экстрэмісцкім фарміраванні, паколькі ў Беларусі «Радыё Свабода» абвешчанае такім фарміраваннем рашэннем Міністэрства ўнутраных спраў ад 23 снежня 2021 года.

13 чэрвеня беларуская праваабарончая супольнасць прызнала Алену Цімашчук палітычнай зняволенай.