Намесніца пракурора Пінска прызналася, што за спісам «экстрэмісцкіх матэрыялаў» сачыць немачыма

Шчырае прызнанне прагучала падчас «Адзінага дня інфармавання», што ладзіўся у сярэдзіне жніўня 2024 года ў аўтобусным парку Пінска. Сярод запрошаных на прапагандысцкае мерапрыемства былі прастаўнікі сілавых структур, а таксама намесніца Пінскага міжраённага пракурора Кацярына Бабіч.

Намесніца Пінскага міжраённага пракурора Кацярына Бабіч. Скрыншот відэа медыякампаніі «Вараг»

Яна вырашыла пагутарыць з работнікамі аўтапарку на тэму спісаў «экстрэмісцкіх матэрыялаў», які складаюць беларускія ўлады ў дачыненні да нелаяльных інтэрнэт-рэсурсаў. Частку гутаркі паказалі на мясцовым дзяржаўным тэлебачанні.

Так, пракурорка спытала аўдыторыю: дзе можна паглядзець рэестр інфармацыйнай прадукцыі, якая прызнана экстрэмісцкімі матэрыяламі? У адказ пачула: «у месэнджарах».

Тады Кацярына Бабіч вырашыла ўдакладніць:   

— На сайце Міністэрства інфармацыі. Там велізарны пералік. Калі раней я заўсёды казала: чытайце, глядзіце пералік — то зараз я кажу: лепш максімальна адпішыцеся ад усяго таго, што вам не трэба.

Такім чынам пракурорка ўскосна прызнала, што за спісам «экстрэмісцкіх матэрыялаў», які зараз налічвае тысячы пазіцый, сачыць ужо проста немагчыма. Таму і зрабіла прапанову шэраговым пінчукам — адпісацца ад усяго.

Дарэчы, менавіта супрацоўнікі пракуратуры з лета 2020 года, пад выглядам барацьбы з «экстрэмізмам», актыўна працуюць над тым, каб адпаведны спіс рэгулярна павялічваўся. Таксама варта нагадаць, што за «распаўсюджванне, захоўванне» інфармацыі, уключанай у спіс «экстрэмісцкіх матэрыялаў» беларускія ўлады працягваюць сістэматчына караюць людзей паводле артыкула19.11 КаАП. За гэта прадугледжаны штраф, адміністрацыйны арышт, а таксама канфіскацыя «прылады правапарушэння» (тэлефоны і камп’ютары).