Беларусы стварылі петыцыю, каб прыбраць фота Пратасевіча з плаката ў цэнтры Гданьска

Беларусы Гданьска збіраюць подпісы пад петыцыяй да Еўрапейскага цэнтра Салідарнасці. Яны хочуць прыбраць партрэт Рамана Пратасевіча з плаката, прысвечанага беларускім палітвязням. Аўтары ліста лічаць, што цяпер ягоная праца шкодзіць Беларусі, піша MOST.

Партрэт Рамана Пратасевіча каля Еўрапейскага цэнтра Салідарнасці. Фота: MOST

Петыцыя была створаная 23 лістапада 2024 года. На дадзены момант яна сабрала больш за 20 подпісаў.

«Мы перакананыя: прысутнасьць партрэту Рамана Пратасевіча ў самым сэрцы Гданьску стала небясьпечна блізкаю да рэклямаваньня ягоных сумнеўных паслугаў ды прасоўваньня прыкрых прапагандысцкіх тэзаў», — пішуць аўтары ліста.

«Раман цяпер мае сваё мэдыя, дзе намагаецца давесьці, што рэжым нібы павярнуўся да літасьці. Робіць гэта ў абсалютна ганебны ды бесчалавечны спосаб: карыстаючыся з пакутаў вязьняў ды іхніх сямей, прымушая іх удзельнічаць у здымках прапагандысцкіх матэрыялаў», — аргументуюць беларусы Гданьска сваю пазіцыю.

Па інфармацыі MOST, банер з партрэтамі вядомых беларускіх палітвязняў з’явіўся каля Еўрапейскага цэнтра Салідарнасці ў 2021 годзе. Тады Раман Пратасевіч быў адным з сімвалаў пратэсту. Але праз тры гады стаўленне да яго ў беларусаў змянілася, бо ён пачаў супрацоўнічаць з беларускім рэжымам.

Банер каля Еўрапейскіага цэнтра Салідарнасці з партрэтамі беларускіх палятвязняў. Фота: Petycjeonline.com/465932

У канцы кастрычніка ў закрытым чаце беларусаў Гданьска прайшло апытанне на тэму таго, ці варта здымаць партрэт Пратасевіча. Сярод 77 удзельнікаў 70% выказаліся за тое, каб яго зняць, і 30% — за захаванне партрэта.

У петыцыі беларусы прапануюць замяніць фота Пратасевіча на партрэт іншай асобы, але канкрэтных імёнаў не называюць.

Не інтэрв’ю, а шоу. Што хацела сказаць прапаганда размовай Пратасевіча з Сабчак

Раман Пратасевіч быў асуджаны 3 мая 2023 года на 8 гадоў калоніі ўзмоцненага рэжыму па справе Nex­ta. 16 мая яго памілавалі, а пазней выключылі са спісу «экстрэмістаў». Пасля гэтага Пратасевіч «вярнуўся» ў блогерства і стаў прасоўваць наратывы беларускай прапаганды.