RSF і Еўрапейская федэрацыя журналістаў заклікалі прэзідэнтку Еўракамісіі прадухіліць прыпыненне праграмы фактчэкінгу Meta

Журналісцкія арганізацыі перакананыя, што калі рашэнне Meta будзе распаўсюджана на краіны ЕС, гэта «катастрафічна адаб’ецца на інфармацыйнай прасторы».

Фота: pexels.com

Міжнародная арганізацыя «Рэпарцёры без межаў» (RSF) і Еўрапейская федэрацыя журналістаў (EFJ) апублікавалі адкрыты ліст да прэзідэнткі Еўрапейскай камісіі Урсулы фон дэр Ляен.

У ім яны заклікаюць процідзейнічаць закрыццю ў ЕС праграмы праверкі фактаў на платфомах Meta.

«Нядаўняя заява Марка Цукерберга, які ідзе па слядах Ілана Маска, з’яўляецца крыжовым паходам супраць журналістыкі. Яго бачанне свабоды выказвання супрацьлеглае журналістыцы: кожнаму даецца права казаць усё, што ён хоча, без увагі на факты. Сутыкнуўшыся з цяперашнім распаўсюджваннем замежнага ўплыва і маніпуляцый інфармацыяй, накіраваных на дэмакратыю, Еўрапейскі саюз не павінен баяцца выконваць свае правілы на буйных інтэрнэт-платформах. DSA [Закон аб лічбавых паслугах] павінен выконвацца, і дэмакратычныя правілы павінны пераважаць», — заявіў генеральны дырэктар RSF Цібо Брутэн.

Таксама праваабаронцаў хвалюе тое, што Google разглядае магчымасць адмовіцца ад сваіх абавязацельстваў падтрымліваць супольнасць праверкі фактаў у адпаведнасці з Кодэксам практыкі Еўрапейскага саюза па дэзінфармацыі. 

Урсулу фон дер Ляєн заклікалі «рашуча супрацьстаяць ціску, які аказваецца на еўрапейскую дэмакратыю» і абавязаць Meta часова прыпыніць сваё рашэнне.

Нагадаем, 7 студзеня генеральны дырэктар Meta Марк Цукерберг анансаваў змены ў падыходах да мадэрацыі кантэнту ў сацсетках карпарацыі «ў святле змены палітычнага і сацыяльнага ландшафту». Meta спыніць сваю праграму фактчэкінгу з даверанымі партнёрскімі арганізацыямі і заменіць яе сістэмай, кіраванай супольнасцю, падобнай да Com­mu­ni­ty Notes на платформе Х.

На наступны дзень некаторыя амерыканскія фактчэкінгавыя арганізацыі пацвердзілі спыненне партнёрства з Meta.

Галоўная еўрапейская прафесійная асацыяцыя фактчэкераў EFCSN у адказ на гэтыя дзеянні выдала заяву, у якой асудзіла і зняпраўдзіла выказванні Цукерберга і заклікала Еўрасаюз «прыкласці ўсе намаганні для стрымлівання распаўсюджвання дэзінфармацыі на вельмі буйных інтэрнэт-платформах».

Арганізацыя «Рэпарцёры без межаў» абвінаваціла Meta, што тая вядзе паслядоўную інфармацыйную палітыку, накіраваную на маргіналізацыю медыяў на сваіх платформах.