Выданне «Медиазона. Беларусь» МУС абвесціў «экстрэмісцкім фармаваннем»

Анлайн-выданне «Медиазона. Беларусь» 26 лютага з’явілася ў «Пераліку арганізацый, фармаванняў, індывідуальных прадпрымальнікаў, датычных да экстрэмісцкай дзейнасці» на сайце МУС Беларусі.

У дакуменце пазначана, што рашэннем Міністэрства ўнутраных спраў Беларусі ад 26 лютага 2025 года «экстрэмісцкім фармаваннем» прызнаная «група грамадзян з ліку кіраўнікоў і актыўных ўдзельнікаў інтэрнэт-праекта «Медыязона. Беларусь», якія, на думку сілавога ведамства, ажыццяўляюць «экстрэмісцкую дзейнасць, у тым ліку з дапамогай сеткавых рэсурсаў».

Пералік гэтых рэсурсаў прыводзіцца таксама:

• інтэрнэт-старонкі mediazona.by і mediazonaby.com;
• электронная пошта з адрасамі info@mediazonaby.com, mediazonaby@gmail.com, mediazona.by@protonmail.com;
• Telegram-канал «Медиазона. Беларусь»,
• Telegram-чат «Рэдакцыя Медыязоны Беларусь»;
• прыватныя старонкі ў Telegram @mediazonaaby і @soboika,
• старонкі ў сацсетцы «ВКонтакте» з назвамі «Медиазона. Беларусь» і «Анастасия Бойко»,
• старонкі ў Insta­gram з назвамі «mediazona.by» і «Анастасія Бойко»,
• старонкі з сацсетцы Х з назвамі «Медиазона. Беларусь» і«anastasija boj­ka»,
• кантакт у Viber,
• два рэсурсы на відэахостынгу YouTube з «Медиазона. Беларусь»,
• старонкі ў Face­book з назвамі «Медиазона. Беларусь» і «Anas­tasiya Boi­ka»,
• два відэаканалы ў Tik­Tok з назвай «Медиазона. Беларусь».

Апрача гэтых інтэрнэт-рэсурсаў, «экстрэмісцкім» прызнаны лагатып медыяпраекта — «у выглядзе літары «М» белага колеру, упісанай у правы ніжні кут кола зялёнага колеру».

У якасці асобы, якая, на думку МУС Беларусі, каардынавала «экстрэмісцкую дзейнасць», згадваецца Наста Бойка. Яе называюць кіраўніком і рэдактарам.

На блізкім да беларускіх сілавікоў Telegram-канале «Книга ГУ«БАЗА» 26 лютага выйшла паведамленне пра тое, што праект «Медиазона. Беларусь» абвешчаны «экстрэмісцкім фармаваннем» за «арганізацыю дзейнасці па падрыхтоўцы да здзяйсненняў пасягальніцтваў на суверэнітэт і грамадскую бяспеку Рэспублікі Беларусь, дыскрэдытацыю і абразы пасадовых асобаў».