«Экстрэмісцкі» спіс Мінінфарма: Telegram-канал вайсковага аналітыка Ігаля Левіна і іншыя рэсурсы

Міністэрства інфармацыі Беларусі папоўніла Рэспубліканскі спіс экстрэмісцкіх матэрыялаў чарговымі інфармацыйнымі інтэрнэт-рэсурсамі.

Ігаль Левін. Фота: з асабістай старонкі ў Face­book

У пералік забароненых гэтым разам уключылі Telegram-канал з назвай «YIGAL LEVIN ILUA» (ідэнтыфікатар t.me/yigal_levin). Рашэнне прызнаць гэты рэсурс «экстрэмісцкімі матэрыяламі» прыняў 27 сакавіка 2025 года суд Баранавіцкага раёна і г. Баранавічы.

Стваральнікам Telegram-канала з’яўляецца Ігаль Левін — вайсковы аналітык, блогер, старшы лейтэнант сухапутных войскаў Арміі абароны Ізраілю. Старонка мае крыху меней за 280 тысяч падпісчыкаў.

«Рэжым Лукашэнкі ў Беларусі прызнаў мой канал экстрэмісцкім, уключыўшы яго ў «чорны спіс» . Дзякуй, але, улічваючы тое, што я, як правіла, нічога не пішу пра Беларусь, тут яўна «настучалі» з Масквы», — так адрэагаваў на «экстрэмісцкі» статус Ігаль Левін. 

24 сакавіка 2025 года суд Гарадоцкага раёна Віцебскай вобласці пастанавіў лічыць «экстрэмісцкай інфармацыйнай прадукцыяй» суполку ў сацыяльнай сетцы «ВКонтакте» з назвай «Беларусь/Новости/NEXTA Live» (ідэнтыфіктар vk.com/nexta.live). Суполка мае 1074 падпісчыкі, апошнія публікацыі былі зробленыя ў ёй 20 жніўня 2020 года.

Таксама ў Рэспубліканскі спіс экстрэмісцкіх матэрыялаў трапілі некалькі інтэрнэт-рэсурсаў, якія асвятляюць падзеі ва Украіне, суполка ў сацсетцы «Одноклассники» з назвай «Светлана Тихановская», старонка ў Insta­gram з назвай «belarus_human_rights_school».

Гэтаксама 1 красавіка на сайце Мінінфармацыі папоўнілі «Спіс друкаваных выданняў, што ўтрымліваюць інфармацыйныя паведамленні або матэрыялы, распаўсюд якіх можа нанесці шкоду нацыянальным інтарэсам Рэспублікі Беларусь».

Гэты пералік «вырас» сёння на 27 пазіцый. У яго ўключылі сярод іншых кнігу «Железный занавес. Подавление Восточной Европы (1946–1956)» аўтарства журналісткі і даследчыцы Эн Аплбаўм (Anne Apple­baum), лаўрэаткі шэрагу ўзнагарод за дасягненні ў журналістыцы і літаратуры. Раней, у студзені 2025 года, «шкоднай» абвясцілі яе кнігу «ГУЛАГ», за якую журналістка была ўганараваная Пулітцэраўскай прэміяй.