Чэхія ўнесла ў санкцыйны спіс былую беларускую журналістку Наталлю Судлянкову

Наталлю Судлянкову абвінавачваюць у супрацы з расійскім ГРУ. У снежні 1999 году яна атрымала прытулак у Чэшскай Рэспубліцы, але, паводле словаў міністра ўнутраных спраў Віта Ракушана, цяпер жанчыне давядзецца пакінуць краіну на працягу 30 дзён.

Наталля Судлянкова. Скрыншот відэа

Былую беларускую журналістку Натальлю Судлянкову і супрацоўніка расейскай спэцслужбы ГРУ Аляксея Шаўрова дадалі ў чэскі нацыянальны санкцыйны сьпіс. Пра гэта ў сераду, 2 красавіка, паведаміла Служба бясьпекі і інфармацыі Чэхіі (BIS). 

З словаў міністра замежных справаў Яна Ліпаўскага, Судлянкова — ключавы супрацоўнік расейскай вайсковай выведкі ГРУ, яна на працягу многіх гадоў таемна і сьвядома працавала на некалькі расейскіх арганізацыяў у Чэскай Рэспубліцы, піша выданьне Sez­nam Zpravy.

Пра тое, што чэскі ўрад дадаў беларускую журналістку Натальлю Судлянкову і супрацоўніка расейскай сакрэтнай службы ГРУ Аляксея Шаўрова ў нацыянальны санкцыйны сьпіс, паведаміў журналістам прэм’ер-міністар Пэтр Фіяла пасьля паседжаньня Кабінэту міністраў.

Фіяла заявіў, што, паводле высноваў Службы бясьпекі і інфармацыі (BIS), Судлянкова выконвала апэрацыі ГРУ ў Чэскай Рэспубліцы, а кіраваў ёю з Масквы Шаўроў. «Абедзьве гэтыя асобы нясуць рызыку і нават пагрозу бясьпецы нашай краіны», — прыводзіць словы Фіялы Sez­nam Zpravy.

Паводле зьвестак чэскай спэцслужбы, акрамя ГРУ, Судлянкова супрацоўнічала з расейскай карпарацыяй «Росатом», Фондам падтрымкі і абароны правоў суайчыньнікаў, мела дачыненьне да грамадзкай арганізацыі «Несьмяротны полк».

«Яе дзейнасьць фінансавалася наўпрост з Расеі. За апошнія гады ёй заплацілі дзясяткі тысяч эўра ў крыптавалюце», — цытуе Ліпаўскага выданьне Sez­nam Zpravy.

Акрамя гэтага, як паведамляецца, на даручэньне ГРУ Судлянкова арганізавала публікацыю некалькіх артыкулаў у чэскіх СМІ, а таксама ажыцьцяўляла дзейнасьць на карысьць расейскага алігарха Алішэра Усманава, які знаходзіцца пад санкцыямі, што таксама стала прычынай уключэньня яе ў сьпіс.

У сьнежні 1999 году Натальля Судлянкова атрымала прытулак у Чэскай Рэспубліцы, але, паводле словаў міністра ўнутраных спраў Віта Ракушана, цяпер ёй давядзецца пакінуць краіну на працягу 30 дзён.

Паводле інфармацыі Respekt, Шаўроў цяпер знаходзіцца ў Расейскай Фэдэрацыі.

**

У Чэхіі Судлянкова працавала галоўным рэдактарам расейскамоўнага штотыднёвіка «Пражский телеграф», які выдаваўся ў Празе. У мінулым яна таксама супрацоўнічала з Радыё Свабодная Эўропа / Радыё Свабода і з выданьнямі Týden і Lidové noviny.

Палітычны прытулак Натальля Судлянкова атрымала празь перасьлед у Беларусі. Там яна нібыта балятавалася ў парлямэнт ад Абʼяднанай грамадзянскай партыі, яе абвінавачвалі ў фінансавых злачынствах. У адным з інтэрвію Чэскай тэлевізіі ў 2011 годзе Судлянкова казала: «У мяне былі пэўныя праблемы з спадаром Лукашэнкам і людзьмі зь ягонай каманды. Мы не маглі заставацца на адной радзіме», узгадвае яе словы выданьне Respekt.

У 2002 годзе яе затрымалі на чэска-нямецкай мяжы на падставе міжнароднага крымінальнага ордэру, выдадзенага ўрадам Беларусі. Але чэскі суд адхіліў запыт Менску аб экстрадыцыі, палічыўшы абвінавачваньні Судлянковай неабгрунтаванымі.

**

Уключэньне ў нацыянальны санкцыйны сьпіс азначае, што адпаведным асобам забараняецца ўезд і знаходжаньне ў Чэскай Рэспубліцы, забараняюцца любыя фінансавыя апэрацыі праз чэскія арганізацыі, замарожваюцца любыя актывы ў краіне.