Барыс Гарэцкі: «Радыё Свабода» і «Радыё Рацыя» – важныя медыя для людзей унутры Беларусі

Намеснік старшыні Беларускай асацыяцыі журналістаў Барыс Гарэцкі адказаў «Радыё Рацыя» на прытанні пра сітуацыю вакол незалежных медыя.

Барыс Гарэцкі. Фота: БАЖ

Распаўсюд незалежнай інфармацыі пад пагрозай. Беларускія незалежныя СМІ сутыкаюцца з праблемай фінансавання. Фіксуюць прадстаўнікі беларускай асацыяцыі журналістаў. Як прыклад, пражская рэдакцыя радыё “Свабода” ад першага сакавіка сышла ў вымушаны адпачынак. Важна, што гэта СМІ мае гісторыю ды багата напрацовак, як распаўсюджваць непадцэнзурную ўладам інфармацыю.

Кажа намеснік старшыні Беларускай асацыяцыі журналістаў Барыс Гарэцкі:

– Радыё “Свабода” – важны інфармацыйны прадукт, які даносіў праўду да беларусаў больш за 70 гадоў. Важнасць працягу працы гэтай рэдакцыі вялікая, бо “Свабода” – гэта перш за ўсё тэхналогіі. “Свабодаўцы” заўсёды маглі дазволіць сабе больш, чым многія беларускія рэдакцыі проста тэхналагічна за кошт той падтрымкі, якую яны мелі. Другое – гэта этыка, журналісцкія стандарты найвышэйшага ўзроўню з Амерыкі.

У сувязі з указам Дональда Трампа аб спыненні дзяржаўнага фінансавання СМІ, якія вяшчаюць на замежную аўдыторыю – “Голас Амерыкі” і “Радыё Свабодная Еўропа/Радыё Свабода”, могуць спыніць сваё вяшчанне. Гэта закране і беларускую службу “Радыё Свабода”. У Амерыцы рашэнне аспрэчваецца ў судах. Найважнейшае, што гэта адбываецца ў крытычны момант, калі ва Украіне вайна ды хвалі рэпрэсій ў Беларусі, працягвае Барыс Гарэцкі:

– Уся прастора незалежнай Беларусі церпіць сур’ёзныя страты праз абмежаванні, уведзеныя Трампам. На жаль, пад гэтыя страты трапілі многія рэдакцыі і медыя. А для медыя сектара вельмі важна захаваць прадукты, якія сапраўды эфектыўна даносяць інфармацыю да людзей унутры Беларусі. Радыё “Свабода”, як і радыё “Рацыя”, – гэта важныя медыя для людзей унутры Беларусі.

Еўрапейскія палітыкі заяўляюць, што трэба знайсці новыя шляхі фінансавання медыя ўнутры Еўразвязу. Гэта не першая пагроза закрыцця “Радыё Свабода”. Першы выпадак адбыўся ў 1992 годзе, калі прэзідэнт Джордж Буш-старэйшы прыняў рашэнне закрыць “Радыё Свабода”, але потым ад гэтай ідэі адмовіўся. Пазней падчас прэзідэнцтва Біла Клінтана, Кангрэс ЗША прымаў рашэнне аб закрыцці 1995 годзе, але тады станцыю ўратавалі еўрапейскія палітыкі.

Цалкам матэрыял слухайце ў далучаным файле: