«Экстрэмісцкім фармаваннем» прызналі YouTube-канал «Партызанская хваля»

YouTube-канал «Партызанская хваля» ўнесены ў «Пералік арганізацый, фармаванняў, індывідуальных прадпрымальнікаў, датычных да экстрэмісцкай дзейнасці» 21 траўня 2025 года.

Выява зроблена БАЖ пры дапамозе Chat­G­PT

З пераліку, які складае на сваім сайце МУС Беларусі, вынікае, што рашэнне прызнаць YouTube-канал «Партызанская хваля» (ідэнтыфікатар youtube.com/@PartizanWave) «экстрэмісцкім фармаваннем» прыняў 2 траўня 2025 года Камітэт дзяржбяспекі Беларусі. Рашэнне ўступіла ў сілу ў той жа дзень.

Паводле КДБ, у фармаванне ўваходзіць «група грамадзян з ліку стваральнікаў, кіраўнікоў і ўдзельнікаў». Канкрэтных прозвішчаў на сайце МУС няма.

Відэапраект «Партызанская хваля» прэзентуе сябе як «канал сяброў беларускіх «Кібер-партызан».

«Асноўны кантэнт — інфармацыйна-аналітычныя ролікі на грунце эксклюзіўных дадзеных — дакументаў і аўдыя- і відэаматэрыялаў, здабытых падчас аперацыі «Жара» (узломы сервераў сілавых ведамстваў дыктатарскага рэжыму Лукашэнкі). Таксама мы публікуем саму інфармацыю, атрыманую ў выніку гэтых узломаў, і каментары «Кібер-партызан» і іхніх паплечнікаў па руху «Супраціў» датычна падзей у Беларусі», — пішуць стваральнікі канала.

Раней гэты YouTube-канал, але на той час з іншым ідэнтыфікатарам, быў прызнаны «экстрэмісцкай інфармацыйнай прадукцыяй». Адпаведнае рашэнне 5 верасня 2022 года прыняў суд Цэнтральнага раёна Гомеля, прызнаўшы «экстрэмісцкай» таксама і старонку «Партызанская хваля» на Patre­on. 

Паводле дзеючага беларускага заканадаўства, асобы, прызнаныя ўдзельнікамі экстрэмісцкага фармавання, могуць быць прыцягнутыя да крымінальнай адказнасці па артыкулах «Стварэнне экстрэмісцкага фармавання альбо ўдзел у ім» (арт. 361–1 КК) ці  за «Садзейнічанне экстрэмісцкай дзейнасці» (арт. 361–4 КК). Санкцыі гэтых артыкулаў — да 10 гадоў пазбаўлення волі.