Абноўлены сайт Ночы расстраляных паэтаў. Беларусы могуць дадаваць свае акцыі памяці на мапу падзей па ўсім свеце

Сёлета з 29 на 30 кастрычніка беларусы будуць адзначаць адну з самых чорных дат у сваёй гісторыі — Ноч расстраляных паэтаў. Абноўлены сайт nochpaetau.com запрашае арганізатараў імпрэзаў дадаваць прымеркаваныя да знакавай даты падзеі на адмысловую мапу.

Летась больш за шэсць дзясяткаў мерапрыемстваў зладзілі беларусы ў розных кутках свету, ушаноўвачы рэпрэсаваных паэтаў. Беларускія дыяспары праводзілі падзеі самастойна, без агульнай каардынацыі — і гэта сведчыць пра тое, што разуменне трагічных падзей тых часоў звязана з сучаснай гісторыяй: беларусы ўшаноўваюць памяць творцаў, бо ўсведамляюць наступствы тэрора рэжыму, каштоўнасць чалавечага жыцця.

Сайт nochpaetau.com у руху ўшанавання служыць добрым месцам навігацыі, якое дазваляе даведацца, дзе і калі адбудзецца падзея, яе фармат. А таксама на пляцоўцы можна знайсці вершы рэпрэсаваных паэтаў, іх пераклады на розныя мовы свету. У прыватнасці, сёлета з’явіўся пераклад верша Міхася Чарота «Прысяга» на ісландскую мову. Творы ў перакладах на іншыя мовы свету будуць дадавацца і далей.

У ноч з 29 на 30 кастрычніка 1937 года, 88 гадоў таму, у Менску, меркавана ва ўрочышчы Курапаты, былі расстраляныя 108 беларускіх дзяржаўных, культурных дзеячаў і навукоўцаў. Сярод іх 22 літаратары: паэты, празаікі, перакладчыкі, крытыкі.

Самаму старэйшаму з забітых, празаіку і публіцысту Янку Нёманскаму, споўнілася 47 год, а сярод самых маладых – паэт і перакладчык Юлій Таўбін (26 год), літаратурны крытык Пётр Хатулёў (25 год), педагог і школьны настаўнік Іван Жылуцкі (25 год).

Расстрэл 29.10.1937 стаў самай трагічнай кропкай хвалі маштабных рэпрэсій супраць нацыянальнай інтэлігенцыі Беларусі.

З 2021 года акцыі памяці на Ноч (расстраляных) паэтаў адбываюцца за межамі краіны і анлайн. Імпрэзы праводзяцца беларускімі дыяспарамі ў розных кутках свету.