Агнешку Рамашэўскую-Гузы звольнілі з пасады дырэктаркі «Белсата»

Пра гэта былая кіраўніца незалежнага тэлеканала паведаміла на сваёй старонцы ў Face­book.

Агнешка Рамашэўская-Гузы. Фота: з асабістага архіва

8 сакавіка былая дырэктарка «Белсата» Агнешка Рамашэўска-Гузы паведаміла, што бюджэт тэлеканала урэзалі амаль на 50%. А сёння ў сваіх сацсетках яна распавяла, што пасля 17 гадоў працы на тэлеканале і  пасля 32 гадоў працы ў TVP яе звольнілі.

«Мне сказалі, што бюджэт тэлеканалу скарачаюць на 47% і гэта рашэнне Міністэрства замежных спраў.

Тэлеканал плануюць падзяліць, таму рускамоўныя праграмы, верагодна, будуць пераведзены на TVP World. На маю думку, гэта вялікая памылка і прынцыповае парушэнне канцэпцыі, якая стваралася гадамі.

«Белсат» меў сэнс і служыў Польшчы ў якасці станцыі, скіраванай  на Усход, у цяперашняй складанай і нават небяспечнай міжнароднай сітуацыі. На мой погляд, разбурэнне такой унікальнай працы і адзінага канала TVP, заснаванага знізу і які працуе пераважна з удзелам яго супрацоўнікаў, гэта памылка».

Нагадаем, што напрамкі працы «Белсата» гэта:

• рэдакцыя тэленавін (беларуская мова);
• рэдакцыя тэленавін (руская мова);
• праграмная рэдакцыя (фільмы, рэпартажы, публіцыстычныя і адукацыйныя праграмы і г.д.);
• інтэрнэт-партал навін на беларускай мове;
• інтэрнэт-партал навін «ВотТак» на рускай мове;
• інтэрнэт-партал навін на польскай мове;
• інтэрнэт-партал навін на англійскай мове;
• падрыхтоўка праграм і кантралёры праграм;
• аддзел сацыяльных сетак;
• аддзел падтрымкі YouTube;
• аддзел тэлетэхнікі і інфарматыкі;
• эканамічны аддзел;
• аддзел аналізу аўдыторыі.

Агнешка Рамашэўская-Гузы нарадзілася ў Варшаве. Скончыла гістарычны факультэт Варшаўскага ўніверсітэту. Яна вядомая як сузаснавальніца Нацыянальнага камітэту незалежнай студэнцкай арганізацыі, першым старшынём якога стаў ейны муж Ярослаў Гузы. Падчас вучобы ў дактарантуры ў ЗША стажыравалася ў амерыканскіх медыях. З 1992 года працавала на нацыянальным Польскім тэлебачанні.