Апеляцыйны суд у Бялградзе выслухаў бакі ў справе Андрэя Гнёта. Рашэнне будзе прынятае цягам 30 дзён

27 жніўня Апеляцыйны суд Сербіі правёў пасяджэнне па скарзе беларускага кінарэжысёра і журналіста Андрэя Гнёта. Гэта апошняя інстанцыя, якая можа заблакаваць рашэнне сербскіх уладаў пра экстрадыцыю Гнёта ў Беларусь альбо наадварот — пагадзіцца з рашэннем Вярхоўнага суда Сербіі.

Андрэй Гнёт. Крыніца фота: DW

Суд на слуханні справы 27 жніўня вывучаў дакументы і дадатковыя аргументы боку абароны. «Паводле закона рашэнне будзе прынятае і абвешчанае цягам 30 дзён», — паведаміла службе маніторынгу БАЖ Марыя Колесава-Гудзіліна, якая разам з адвакаткай Ганнай Маціеўскай выступаюць бокам абароны журналіста.

Сам Андрэй Гнёт з меркавання бяспекі ад каментароў і камунікацыі з медыямі пакуль адмаўляецца, увёў «рэжым цішыні».

Андрэй Гнёт знаходзіцца пад хатнім арыштам ад пачатку лета, да гэтага яго ўтрымлівалі ў бялградскай турме.

Беларускія ўлады дамагаюцца экстрадыцыі Гнёта з Сербіі па лініі Інтэрпола, абвінавачваючы яго паводле часткі 2 артыкула 243 Крымінальнага кодэкса (ухіленне ад выплаты падаткаў). Увесну ўладамі Сербіі было вырашана выдаць актывіста Беларусі, але рашэнне ўдалося паспяхова абскардзіць, справу адправілі на перагляд.

Сёлета ў ліпені Інтэрпол адмовіўся ад пераследу Андрэя Гнёта і заявіў пра палітычны складнік яго справы.

Справа Андрэя Гнёта

41-гадовы Андрэй Гнёт — рэжысёр тэлерэкламы і музычных кліпаў, журналіст і сузаснавальнік аб’яднання SOS.by, якое ў Беларусі прызнанае ўладным рэжымам «экстрэмісцкім фарміраваннем».

Быў затрыманы 30 кастрычніка 2023 года памежнай службай Сербіі пасля прылёту ў Бялград і перададзены паліцыі. Прычына затрымання — знаходжанне ў міжнародным вышуку на запыт беларускага бюро Інтэрпола. Ведамства прасіла экстрадаваць Гнёта ў Беларусь для крымінальнага пераследу.

Мінск сцвярджае, што справа носіць эканамічны характар, абарона Гнёта настойвае, што яго пераследуюць па палітычных матывах.

За Гнёта заступіліся дэмакратычныя сілы, прадстаўнікі дыяспар, беларускія і міжнародныя праваабарончыя арганізацыі, Еўрасаюз, сітуацыя абмяркоўвалася з уладамі ЗША.