Апеляцыю асуджанага медыяменеджара Канстанціна Залатых пакінулі без задавальнення

Пасяджэнне адбывалася ў закрытым рэжыме, таму падрабязнасці «засакрэчаных» слуханняў невядомыя. З анонса на сайце Вярхоўнага суда толькі вынікае, што на працэс быў прызначаны суддзя Уладзімір Чаравач — у сярэдзіне чэрвеня ён гэтак жа не знайшоў падстаў, каб змякчыць пакаранне іншаму журналісту Генадзю Мажэйку.  

Канчатковага вердыкту Канстанцін Залатых чакаў у следчым ізалятары № 1 Мінска. Цяпер яму давядзецца рыхтавацца да этапу ў калонію, прызначаную наглядным органам.    

Апублікаваны расклад пацвярджае, што абарона Канстанціна Залатых аспрэчвала тыя ж артыкулы, на падставе якіх яго справу разглядаў Мінскі гарадскі суд. Перадусім гэта дыфамацыйныя пункты, якія звыкла фігуруюць у крымінальных справах за іншадумства. 

– ч. 2 арт. 130 КК — распальванне расавай, нацыянальнай, рэлігійнай або іншай сацыяльнай варожасці; 

– ч. 1 арт. 368 КК — абраза прэзідэнта Рэспублікі Беларусь;

– арт. 369 КК — абраза прадстаўніка ўлады;

– ч. 2 арт. 426 КК — перавышэнне ўлады ці службовых паўнамоцтваў.

  Пайшоў чатырнаццаты месяц, як вязня ўтрымліваюць у няволі. Яго разам з калегамі па рэдакцыі затрымалі 18 траўня 2022 года супрацоўнікі Камітэта дзяржбяспекі. Пасля допыту галоўнага рэдактара Андрэя Александровіча і бухгалтарку Юлію Кахно адпусцілі, а Канстанціна Залатых пакінулі пад вартай.

Спачатку медыяменеджар знаходзіўся ў следчым ізалятары Жодзіна, а потым яго перавялі ў СІЗА № 1 Мінска. 

Мінскі гарадскі суд прыступіў да разгляду справы толькі сёлета 24 сакавіка. Суддзя Алена Шылько, у якой багаты досвед працы з «палітычнымі», адразу зрабіла працэс закрытым.  

У працэсе агучвання довадаў, атрыманых ад следства, бок пракуратуры прыйшоў да высновы: дырэктар газеты «Белорусы и рынок» актыўна выказваў «уласную тэндэнцыйную пазіцыю» на падзеі ў краіне, што, сярод іншага, выявілася ў абразлівых каментарах на адрас вышэйшых асобаў дзяржавы, пакінутых у сацыяльных сетках. Акрамя таго, ён нібыта «мэтанакіравана карыстаўся службовым становішчам» для вырашэння персанальных патрэбаў.

На падставе гэтых абвінавачанняў Канстанціна Залатых пакаралі сукупна 4 гадамі калоніі агульнага рэжыму.    

Адметна, што першапачаткова яго затрымлівалі толькі за «распальванне варожасці», астатнія эпізоды канстатавалі як факт ужо падчас знаходжання за кратамі. 

Канстанцін Залатых — медыйны менеджар і вытворчы адміністратар. Супрацоўнічаў з вядучымі незалежнымі СМІ і буйнымі дзяржаўнымі прадпрыемствамі, неаднаразова быў у складзе афіцыйных дэлегацый, якія прасоўвалі беларускую прадукцыю на знешнія рынкі.

Апошнім месцам працы была газета «Белорусы и рынок» — адно з рэдкіх незалежных выданняў, якое здолела захавацца пасля хвалі масавых рэпрэсій супраць недзяржаўных рэдакцый.

Летась 23 ліпеня, ужо пасля затрымання Канстанціна Залатых, доступ да сайта belmarket.by ў Беларусі быў заблакаваны Міністэрствам інфармацыі «з прычыны распаўсюду гіперспасылак на матэрыялы, прызнаныя судом экстрэмісцкімі».

У канцы таго года ведамства нечакана скасавала ранейшае рашэнне і аднавіла доступ да інтэрнэт-старонкі выдання. З таго часу кантэнт рэсурсу рэгулярна абнаўляецца.  

Чытайце яшчэ:

«Калі журналіст будзе рабіць два вялікіх якасных матэрыялы на месяц, яму на хлеб не хопіць». Гутарка з рэжысёркай Ксеніяй Галубовіч

«Если бы удалось поговорить с кем-то из окружения Лукашенко, это был бы крутой вызов». Почему важно оставаться в контакте с властью

Экс-рэдактара ліквідаванай «Новай газеты Смаргоні» пакаралі 7 суткамі арышту