У Віцебску судзілі журналіста і культуролага Георгія Каржанеўскага

Пра суд над журналістам і культуролагам Георгіем Каржанеўскім стала вядома з  раскладу  суда Першамайскага раёна Віцебска на 7 лютага 2025 года. Прадметам разбіральніцтва былі пратаколы за «распаўсюд экстрэмізму» у інтэрнэце (ч.2 арт.19.11 КаАП)  і за «прапаганду нацысцкай сімволікі» (ч.2 арт. 19.10 КаАП).

Георгій Каржанеўскі. Крыніца фота: Вясна

На цяперашні момант звязацца з Георгіем Каржанеўскім  праз мабільны тэлефон немагчыма, у сацыяльных сетках ён не з’яўляўся ўжо некалькі дзён. Таму ёсць падставы меркаваць, што ён асуджаны да адміністрацыйнага арышту.  Спраўдзіць гэта няма ў каго, бо Каржанеўскі не мае сям’і і жыве адзін.

У якасці журналіста ён працяглы час супрацоўнічаў з выданнем «Витебский курьер».  Тэматыка  артыкулаў была выключна культурніцкай, і ў асноўным гэта былі агляды мастацкіх выставаў або іншых  імпрэзаў у Віцебску.  Ад актыўных заняткаў журналістыкай Георгій Каржанеўскі адышоў у 2018–2019 гг. Час ад часу ён з’язджаў на заробкі ў Польшчу, але ў Віцебску з’яўляўся рэгулярна.

У апошнія гады Георгій Каржанеўскі актыўна займаўся ўласным культуралагічным праектам – стварыў рэсурс  «Гондвана сакральная», на якім размяшчаў свае нарысы з філасофскімі, містычнымі і эзатэрычнымі разважаннямі.