«Брестcкий вестник» узнагародзілі за асвятленне экалагічнай тэматыкі. Выданне выступае за будаўніцтва акумулятарнага завода

На філалагічным факультэце Брэсцкага дзяржаўнага ўніверсітэта імя А.С.Пушкіна адбылася ўрачыстая цэрымонія, падчас якой падсумавалі вынікі конкурсу сярод рэгіянальных СМІ і журналістаў Брэсцкай вобласці, і адзначылі пераможцаў.

Сярод рэдакцый абласных, аб’яднаных і рэгіянальных газет лепшым прызнана баранавіцкае дзяржаўнае выданне “Наш край”, а сярод рэдакцый раённых і гарадскіх газет дыпломы атрымалі “Навіны Камянеччыны” і “Лунінецкія навіны”.

У розных намінацыях атрымалі ўзнагароды больш за 20 журналістаў дзяржаўных выданняў.

Акрамя таго, спецыяльнымі дыпломамі адзначаны абласная газета “Заря” (за творчы праект для дзяцей і бацькоў “Лучик”), брэсцкая раённая газета “Заря над Бугом” (за творчы падыход у пошуку тэм і падачы матэрыялаў сельскагаспадарчай тэматыкі) і гарадская газета «Брестcкий вестник»(за актуальнасць, аператыўнасць і аналітычны падыход у асвятленні матэрыялаў экалагічнай тэматыкі).

Адзнака апошняга з пералічаных выданняў менавіта ў гэтай намінацыі вартая асаблівай увагі, бо «Брестcкий вестник» у друкаванай версіі і на сваёй інтэрнэт-старонцы паслядоўна абараняе планы будаўніцтва каля Брэста акумулятарнага завода, супраць якога выступаюць многія жыхары горада і ваколіцаў, бо лічаць гэтую будоўлю экалагічна небяспечнай.

Яшчэ некалькі гадоў таму незалежныя выданні брэсцкага рэгіёна і асобныя журналісты не толькі бралі ўдзел у аналагічных конкурсах, але і былі сярод пераможцаў.

«Цяпер улады ігнаруюць недзяржаўную прэсу і нават не запрашаюць на ўрачыстасці, каб можна было пабачыць, каго сярод калегаў прызналі лепшымі”, — адзначае галоўны рэдактар “Брэсцкай газеты” Віктар Марчук.

Увогуле ж штогадовы конкурс сярод рэдакцый рэгіянальных сродкаў масавай інфармацыі і журналістаў Брэсцкай вобласці ладзіўся ў 14‑ы раз. Месцам для ўрачыстасцяў філалагічны факультэт БрДУ імя А.С.Пушкіна быў абраны з той нагоды, што чатыры гады таму тут было адчынена аддзяленне журналістыкі.