«Доўгія тэксты чытаць не будуць». Рэдактарка раёнкі патлумачыла, чаму праграмы кандыдатаў у дэпутаты амаль незаўважныя ў дзяржаўных СМІ

У сваіх развагах яна запэўнівае, што «беларусы — людзі, якія разумеюць, больш за тое, упэўненыя ў сваёй грамадзянскай пазіцыі». Рэдактарка сцвярджае, што пасля папярэдняй выбарчай кампаніі жыхары Беларусі «вывучылі пэўныя ўрокі і зрабілі працу над памылкамі».

Але, на думку Алены Клімушкі, нейкія «дэструктыўныя элементы» ўсё роўна спрабуюць дыскрэдытаваць цяперашнюю электаральную кампанію. Так рэдактарка адрэагавала на заўвагі выбаршчыкаў, што ў дзяржаўных СМІ няма звестак пра склад выбарчых камісій, як гэта было ў папярэднія гады, адсутнічае інфармацыя пра маёмасць і заробкі саміх кандыдатаў у дэпутаты, а іх праграмы пададзеныя вельмі сцісла — займаюць усяго па паўтары старонкі тэксту.

«Мусіць, трэба было сачыненне напісаць. Але ж вядома, што наўрад ці доўгія тэксты будуць чытаць. Ды і навошта? Усё павінна быць у сутнасці», — так тлумачыць Алена Клімушка кароткі змест паведамленняў пра будучых «народных абраннікаў».

Паводле слоў рэдактаркі дзяржаўнай раёнкі, няма нічога дзіўнага і ў тым, што кандыдаты кажуць не пра праблемы ў выбарчых акругах, якія трэба вырашаць, а гавораць пра безумоўную падтрымку цяперашніх уладаў.

Нагадаем, напярэдані сёлетніх выбараў у Столінскім раёне быў спачатку заблакаваны Міністэрствам інфармацыі, а 13 лютага рашэннем суда прызнаны «экстрэмісцкім» незалежны інтэрнэт-рэсурс stolin.bу. Рэдактара гэтага сайта Аляксандра Ігнацюка сілавікі затрымалі і змясцілі пад варту ў жніўні 2023 года. Яго асабістыя старонкі ў ў сацыяльных сетках улады таксама палічылі «экстрэмісцкімі матэрыяламі». 

Чытайце яшчэ:

Чацвёртая ўлада: як лакальныя медыі ўплываюць на гарадское жыццё

Зняволенага магілёўскага відэааператара Яўгена Глушкова прызналі палітвязнем

Нармалізацыя як умова выжывання. Што цяпер асвятляюць «перафарматаваныя» выданні