Эстафету падтрымкі палітзняволеных журналістаў прынялі ў Капенгагене
5 чэрвеня 2023
Гэта адбылося падчас канферэнцыі Дацкага Хельсінскага камітэта. Прадстаўнікоў беларускіх медыя, якія цяпер знаходзяцца за кратамі, падтрымалі ўплывовыя праваабаронцы.
На канферэнцыі найперш абмяркоўвалася дэпартацыя дзяцей з Украіны. Але беларускай дыяспары атрымалася закрануць і нашу сітуацыю.
— Цяпер у цэнтры ўвагі заходніх медыя, у тым ліку ў Даніі, вайна ва Украіне, — расказала БАЖ прадстаўніца беларускай дыяспары, якую запрасілі на канферэнцыю. — Гэта дазваляе беларускаму рэжыму ў цені працягваць парушаць правы чалавека.
Таму беларусы ў многіх краінах свету спрабуюць данесці інфлюэнсерам пра жахлівае становішча больш за 1500 палітычных вязняў у Беларусі.
— У мяне было 15 хвілін, — працягвае наша суразмоўца. — Канешне, за гэты час усяго не ахопіш. Я звярнула ўвагу на новы ўзровень катавання: цяпер невядома пра стан некаторых палітзняволеных — Віктара Бабарыкі, Міколы Статкевіча і іншых.
Пасля выступу беларуска прапанавала падтрымаць марафон салідарнасці з палітзняволенымі беларускімі журналістамі, які стартаваў у Вільні 3 траўня з сумеснай акцыі БАЖ і Саюза журналістаў Літвы.
Падзякаваць БАЖ праз Patreon
Да прапановы ўжо далучыліся ў некалькі краінах: Швецыі, Фінляндыі і іншых.
— Дацкі Хельсінскі камітэт — уплывовая ў краіне арганізацыя, — падкрэслівае прадстаўніца беларускай дыяспары. — Праваабаронцы, якія трымаюць партрэты беларускіх журналістаў, гэта паважаныя людзі, да іх меркавання прыслухоўваюцца. Іх жаданне падтрымаць палітвязняў не проста знак пашаны.
БАЖ заклікае калег ва ўсім свеце падтрымаць акцыю салідарнасці!
Вы можаце раздрукаваць партрэты зняволеных калег, сфатаграфавацца з імі ў пазнавальных месцах вашага горада (не ў Беларусі) і апублікаваць у сацыяльных сетках з тэгамі #СвабодуЖурналістам і #BecauseTheJournalist, а таксама даслаць нам на адрас office@baj.media ці intercomm@baj.media .
#СвабодуЖурналістам
#BecauseTheJournalist
Чытайце яшчэ:
«Трымаемся праўды, трымаемся разам!» З Вільні стартаваў марафон салідарнасці са зняволенымі калегамі
Саюз журналістаў Фінляндыі правёў акцыю ў падтрымку беларускіх палітзняволеных медыйшчыкаў
Журналісты не злачынцы! У цэнтры Мальмё прайшла акцыя ў падтрымку беларускіх калег
@bajmedia
