Міністр інфармацыі перакананы: усе беды беларусаў — ад альтэрнатыўных навінавых рэсурсаў
7 красавіка 2023
Працягвае свае прапагандысцкія ваяжы па рэгіёнах міністр інфармацыі Уладзімір Пярцоў. У часе наведвання рэдакцыі газеты «Ляхавіцкі веснік» чыноўнік паразважаў пра важнасць ідэалагічнага складніка ў супрацьстаянні са шкоднымі «альтэрнатыўнымі рэсурсамі».
Сустрэча міністра інфармацыі Уладзіміра Пярцова з чыноўнікамі і журналістамі ў Ляхавічах. Фота: газета «Ляхавіцкі веснік»
6 красавіка кіраўнік міністэрства інфармацыі паўдзельнічаў у пасяджэнні Ляхавіцкага раённага выканаўчага камітэта, а таксама правёў сустрэчу з працоўным калектывамі мясцовай раённай газеты і бібліятэчнай сістэмы. Адпаведная справаздача змешчаная на сайце «Ляхавіцкага весніка».
Як і падчас аналагічных візітаў у іншыя месцы, Уладзімір Пярцоў пазіцыянаваў сябе перадусім у ролі «агітатара і прапагандыста» дзейнага палітычнага рэжыму.
«Ідэалогія — гэта імунная сістэма дзяржавы. Калі не будзе гэтага імунітэту, любы вірус, занесены праз альтэрнатыўныя інфармацыйныя рэсурсы, будзе разбураць дзяржаву», — папярэдзіў прадстаўнік ведамства, якое ўсё больш ператвараецца ў чарговы рэпрэсіўны орган дзеля змагання з іншадумствам.
Уладзімір Пярцоў паслядоўна абвінавачвае незалежныя медыя ў «хайпе» на неправеранай інфармацыі, хоць ускосна і прызнае, што праблем у рэгіёнах сапраўды хапае. Але ён катэгарычна супраць, каб гэтыя праблемы ператвараць у «гарачыя тэмы» — маўляў, улады самі ва ўсім разбяруцца.
Сустрэча міністра інфармацыі Уладзіміра Пярцова з чыноўнікамі і журналістамі ў Ляхавічах. Фота: газета «Ляхавіцкі веснік»
«У раёнах адпрацоўваюць не нейкую там глабальную палітычную позву. Настрой у людзей ствараюць бытавыя, сацыяльныя, камунальныя пытанні. А «ўкіды» ў альтэрнатыўныя каналы і чаты фармуюцца на падставе фэйкаў або фактычных падзей (лямпачка, дарога, чарга ў паліклініцы, месцы ў дзіцячым садку, іржавая вада), калі на іх своечасова не зрэагавалі ў раёне, калі людзі не дастукаліся ў газету ці выканкам», — падкрэсліў міністр важнасць працы з надзейнымі крыніцамі інфармавання.
Каб стварыць бачнасць «ідэалагічнай эстафеты пакаленняў», аддзел адукацыі райвыканкама застымуляваў наведваннем рэдакцыі «Ляхавіцкага весніка» навучэнцаў раённай Навасёлкаўскай сярэдняй школы.
Сустрэча міністра інфармацыі Уладзіміра Пярцова з вучнямі ў Ляхавічах. Фота: газета «Ляхавіцкі веснік»
Прычым галоўнай мэтай чыноўнікаў, натхнёных прысутнасцю міністра, было не знаёмства падлеткаў з кухняй вытворчасці мясцовых навін, а «абмеркаванне асноўных тэзісаў паслання Аляксандра Лукашэнкі беларускаму народу і нацыянальнаму сходу».
«Непадробны энтузіязм», з якім дзеці «ўторкнуліся» ў разасланыя асобнікі газет, выразна бачны з фотасправаздачы, змешчанай на сайце раённага выдання.
Адной з асноўных функцый Міністэрства інфармацыі ў апошнія гады з’яўляецца не дапамога медыям стварыць роўныя ўмовы ў іх прафесійнай дзейнасці, а мэтанакіраванае «шэльмаванне» недзяржаўных СМІ.
Сустрэча міністра інфармацыі Уладзіміра Пярцова з чыноўнікамі і журналістамі ў Ляхавічах. Фота: газета «Ляхавіцкі веснік»
Дзякуючы імпэту ведамства, імкліва пашыраецца так званы «рэспубліканскі спіс экстрэмісцкіх матэрыялаў», у які трапляюць як цэлыя рэдакцыі, так і асобныя акаўнты журналістаў у сацсетках.
Шэраг папулярных рэсурсаў з прычыны рэпрэсіўнай палітыкі ўладаў або спынілі існаванне, або вымушана выехалі за мяжу. 35 супрацоўнікаў СМІ асуджаныя па крымінальных артыкулах ці яшчэ ў чаканні вырашэння свайго лёсу.
Наглядны орган цалкам апраўдвае неабгрунтаваны пераслед незалежных медый, але адразу ж пачынае біць трывогу, калі на міжнародных інтэрнэт-пляцоўках абмяжоўваюць доступ да якога-небудзь адыёзнага прапагандыста за распальванне непрыхаванай варожасці.
Чытайце яшчэ:
Вольга Класкоўская: Як тут не параноіць, калі ў ваннай ляжыш, а да цябе ГУБАЗіК урываецца?
Стваральніца падкаста «Вясна прыйдзе»: Меншае, што мы можам зрабіць, — гэта ведаць пра досвед людзей, якія побач з намі
Ідзе прыём матэрыялаў на конкурс «Вольнае слова» (да 1 траўня)
@bajmedia
