Суд у Паставах над Змітром Лупачам не адбыўся, «бо вельмі заняты суддзя»

7 чэрвеня Зміцер Лупач як добрасумленны грамадзянін выехаў у Паставы на суд. Але, як толькі журналіст заехаў у Паставы, яму патэлефанавалі з суда Пастаўскага раёна і паведамілі, што суд над ім не адбудзецца, бо вельмі заняты суддзя. Потым дадалі, што судовае слуханнне перанесенае на панядзелак 11 чэрвеня.

Зміцер Лупач пасля кансультацыі са сваім адвакатам вырашыў падаць скаргу на такія дзеянні суда Пастаўскага раёна.

Сёлета гэта шосты суд, які мае адбыцца над незалежным журналістам. У Паставах Змітра Лупача збіраюцца судзіць за сюжэт “Калгас – банкрут, спіртзавод зачынілі. Як город стаў вёскай”, паказаны на незалежным тэлеканале “Белсат”.

Нагадаем, папярэдні суд у Докшыцах закрыў справу Змітра Лупача з‑за недаказанасці віны.