Палітзняволены Дзяніс Івашын чатыры месяцы не можа патэлефанаваць родным

Палітзняволены журналіст Дзяніс Івашын пазбаўлены тэлефанавання ужо чатыры месяцы запар – у снежні, студзені, лютым і сакавіку. Пра гэта паведаміла ягоная жонка Вольга.

Фота: сацсеткі Вольгі Івашынай

«На жаль, і ў гэтым месяцы мы не дачакаліся тэлефоннага званку ад Дзяніса Івашына. Блякада адзінай крыніцы наўпроставай сувязі зь ім працягваецца, а мы ды й сам Дзяніс па-ранейшаму ня ведаем прычыны», — напісала Вольга ў тэлеграм-канале, прысвечаным жураналісту.

Дзяніс Івашын адбывае пакаранне ў турме №8 Жодзіна. Апошні званок ад яго быў 12 лістапада летась. Палітзняволены мае права на адно тэлефанаванне родным на месяц. Раней Вольга выказвала меркаванне, што мужа з нейкай нагоды пазбавілі штомесячных тэлефонных званкоў яшчэ ў снежні і ён не можа пра гэта паведаміць.

Паводле жонкі палітвязня, у лістах Дзяніс просіць не хвалявацца за ягонае здароўе, а таксама піша, што ў зняволенні шмат чытае. Кнігі ён часам набывае сам, але большасць бярэ ў турэмнай бібліятэцы. З апошніх прачытаных твораў Дзяніс узгадвае аповесць Сяргея Пясецкага «Каханак Вялікай Мядзведзіцы» і раман ірландскага пісьменніка Пола Лінча «Песня прарока».

Справа Дзяніса Івашына

Гродзенскага журналіста Дзяніса Івашына затрымалі супрацоўнікі КДБ 12 сакавіка 2021 года.

14 верасня 2022 года Гродзенскі абласны суд прызнаў Івашына вінаватым паводле двух артыкулаў Крымінальнага кодэкса: часткі 1 артыкула 356 КК (здрада дзяржаве) і артыкула 179 КК (незаконны збор і распаўсюд звестак аб прыватным жыцці).

Суддзя Валерый Раманоўскі прыгаварыў журналіста да пазбаўлення волі на 13 гадоў і 1 месяц у калоніі ва ўмовах узмоцненага рэжыму і штрафу ў памеры 4800 рублёў. Апроч гэтага, Івашын мусіў выплаціць кампенсацыю маральнай шкоды дзевяці пацярпелым сілавікам — агулам 22 800 беларускіх рублёў.

Напрыканцы чэрвеня 2023 года журналісту ўзмацнілі пакаранне і перавялі з папраўчай калоніі № 15 на турэмны рэжым. Пра суд па змене рэжыму ані сваякі, ані адвакат не ведалі. Зараз палітзняволены журналіст знаходзіцца ў турме № 8 горада Жодзіна.

Да арышту Дзяніс Івашын працаваў карэспандэнтам незалежнай агульнанацыянальнай газеты «Новы Час» і быў беларускім рэдактарам міжнароднай супольнасці расследавальнікаў Inform­Na­palm. Вядомы сваімі расследаваннямі пра скандальную будоўлю рэстарана побач з мемарыяльным урочышчам Курапаты, а таксама пра былых украінскіх «беркутаўцаў», што пасля перамогі Еўрамайдана ў 2014 годзе ўладкаваліся на працу ў беларускі АМАП.

Найверагодней, публікацыі пра сілавікоў сталі «апошняй кропляй». Журналіста схапілі літаральна на наступны дзень, як ён даў інтэрв’ю пра гэта незалежнаму тэлеканалу «Настоящее время».