Газета «Наша слова» мяняе фармат

На першай старонцы змешчаны вялікі артыкул Станіслава Судніка, дзе ён паведамляе, што “пакуль не адновіцца папяровае выданне “Нашага слова”, электронная газета “Наша слова. pdf” будзе выконваць тыя ж функцыі, друкаваць матэрыялы той жа тэматыкі.

Новая газета будзе адназначна размяшчацца на сайтах http://nslowa.by/, http://pawet.net/, http://kamunikat.org/, http://belkiosk.by/. Матэрыялы з газеты будуць размяшчацца на сайце http://nslowa.by/, у фэйсбуку https://www. facebook.com/nslowa.by.

Новая газета захоўвае аб’ём, але мяняе фармат. Газета будзе выходзіць у фармаце А‑4. Па меркаванні спецыялістаў, у электронным друку, у такім фармаце лягчэй чытаць на экране, але ёсць і другая прычына. Мяркуецца раздрукоўка газеты на паперу самімі карыстальнікамі…”.

Дарэчы, рашэнне весці папяровую падшыўку газеты ўжо прыняў літаратурны філіял Лідскага гісторыка-мастацкага музея, магчыма, такое ж рашэнне прыме і Лідская раённая бібліятэка імя Янкі Купалы, а таксама іншыя ўстановы Беларусі і проста чытачы.

Далей спадар Суднік звяртаецца да чытачоў і просіць іх “не ўпадаць у адчай, не апускаць рукі, а працягваць пісаць і чытаць “Наша слова”.

У першым электронным нумары “Нашага слова” значная частка матэрыялаў з Ліды. А хацелася б мець і з астатніх рэгіёнаў Беларусі. Таму рэдактар газеты просіць дасылаць матэрыялы з усёй Беларусі.

“Наступіла новая рэальнасць. Дык што, беларусам у ёй няма месца? Калі каму гэтага і хочацца, то мусім разачараваць і братоў, і суседзяў, беларусы і беларуская мова перажывуць і чарговую хвалю антыбеларускасці, беларусы не пакінуць змаганне за адзіную, святую і дзяржаўную беларускую мову”, — упэўнена заяўляе рэдактар “Нашага слова”.