• Актуальнае
  • Медыяправа
  • Карыснае
  • Кірункі і кампаніі
  • Агляды і маніторынгі
  • Рэкамендацыі па бяспецы калег

    Google News больш не будзе падтрымліваць ручное стварэнне медыястаронак. Як гэта паўплывае на паказ кантэнту?

    Па словах SEO-спецыялісткі агенцтва SEO­for­Me­dia Елізаветы Марынінай, з гэтага часу асаблівую ролю для паказу ў Google News будуць адыгрываць якасць і ўнікальнасць кантэнту, празрыстасць, паводзіны карыстальнікаў і тэхнічны стан сайта.

    Google News больш не падтрымлівае ручное стварэнне медыястаронак

    Фота: Reuters

    Google перайшоў на аўтаматычнае стварэнне старонак медыяў у сэрвісе Google News. Пра гэта паведамляецца ў даведцы Google.

    З гэтага моманту рэдакцыі не змогуць самастойна ствараць старонкі праз RSS-каналы або дадаваць URL-адрасы. Google таксама прыбраў большасць функцый наладкі ў Pub­lish­er Cen­ter, таму выданні не змогуць змяняць сваю назву, лагатып або ствараць уласныя тэматычныя раздзелы. Замест гэтага Google будзе выкарыстоўваць значкі вэб-старонак для лагатыпаў, а назвы сайтаў для назваў медыяў.

    Відэа на YouTube таксама нельга будзе адпраўляць праз Pub­lish­er Cen­ter для Google News або Google Assis­tant. Пры гэтым відэа, размешчаныя непасрэдна на YouTube, аўтаматычна ўлічваюцца ў сістэмах Google.

    Акрамя таго, абнаўленні азначаюць, што выданні не змогуць абмяжоўваць бачнасць публікацый па краінах, за выключэннем выпадкаў, калі ідзе гаворка пра навінавыя панэлі News Show­case.

    SEO-спецыялістка агенцтва SEO­for­Me­dia Лізавета Марыніна ў каментары для Medi­aS­api­ens патлумачыла, што раней СМІ маглі самастойна кіраваць сваёй прысутнасцю ў Google News, у прыватнасці ўручную дадаваць арганізацыю, карэктаваць знешні выгляд старонкі, указваць інфармацыю аб асноўнай тэматыцы сайта і яго структуры.

    «Гэта давала магчымасць больш выразна «растлумачыць» алгарытмам, хто мы, што выдаем і для якой аўдыторыі. І хаця афіцыйна гэта не гарантавала траплення ў стужку, такая дэталізацыя, безумоўна, магла станоўча паўплываць на бачнасць у стужцы», — сказала Марыніна.

    Цяпер, паводле яе словаў, акцэнт павінен перамясціцца на тэхнічную якасць сайта і давер да медыя. І хоць гэтыя фактары гулялі значную ролю і да зменаў, цяпер асаблівае значэнне будзе мець тэхнічны стан дамена, яго рэпутацыя і паводзіны карыстальнікаў.

    «Неабходна сачыць за тым, каб усе старонкі адпавядалі асноўным тэхнічным патрабаванням: разметка артыкулаў, карэктная карта сайта, хуткая загрузка, адаптацыя да мабільных прылад — усё гэта крытычна важна. І, вядома ж, празрыстасць: празрыстая інфармацыя аб аўтарах, кантактная інфармацыя, абнаўленне кантэнту, адсутнасць клікбэйтаў, фэйкавай або шкоднай для чытача інфармацыі на старонках. Алгарытмы ўсё часцей «чытаюць паміж радкоў» — не толькі тое, што мы пішам, але і як, для каго і наколькі гэта карысна», — сказала SEO-спецыялістка.

    Негатыўныя змены ў трафіку з News, хутчэй за ўсё, будуць нязначнымі або наогул адсутнічаць для тых выданняў, якія раней сачылі за гэтымі аспектамі ў сваёй працы. Калі ж такія праблемы ёсць, іх трэба своечасова ліквідаваць.

    Google таксама пацвердзіў, што рэсурсы, якія адпавядаюць стандартам якасці кантэнту, будуць працягваць з’яўляцца ў Google News. Матэрыялы ранжыруюцца па значнасці, надзейнасці, папулярнасці, мове, геаграфіі і агульнай каштоўнасці для чытачоў.

    Лізавета Марыніна мяркуе, што прычынай абмежавання сэрвису з’яўляецца жаданне паменшыць ручное ўздзеянне з боку выдаўцоў і ўніфікаваць працэс. Такім чынам Google спрабуе зрабіць немагчымымі спробы выдаўцоў «падстройвацца» пад алгарытмы замест стварэння якаснага прадукту.

    «Са з’яўленнем AI-сэрвісаў аб’ём кантэнту і хуткасць яго стварэння моцна ўзрастаюць. Якасных, а не згенераваных для распаўсюджвання матэрыялаў сярод іх становіцца ўсё менш. Таму Google хоча самастойна, незалежна ад медыяў выбіраць, што будзе паказваць у сваіх сэрвісах», — пастлумачыла SEO-спецыялістка.

    Акрамя таго, такія змены могуць быць спробай паменшыць магчымасць маніпулявання карыстальнікамі, прадухіліць распаўсюджванне фэйкавых навін з ненадзейных крыніц і адсекчы копіі.

    На думку Елізаветы Марынінай, наступствы для медыяў можна будзе ацаніць толькі праз час.

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці