Гродзенскія БАЖаўцы падвялі вынікі працы ў 2018 годзе

Цэнтральнай інфармацыйнай падзеяй года стаўся ўдзел гродзенскай суполкі ГА “БАЖ” у арганізацыі першай у горадзе сусветна вядомай выставы “World Press Pho­to”, на якой можна было пабачыць найлепшыя прэс-фотаздымкі з усіх куткоў планеты.

Гродзенскія сябры БАЖ выказалі свае меркаванні наконт бачання будучай дзейнасці журналісцкай арганізацыі, развіцця новых ініцыятываў. Прыярытэтным накірункам дзейнасці, на думку большасці, маюць быць адукацыйныя праграмы.

Падчас пасяджэння ў склад арганізацыі прынялі новых сябраў. Гэта журналістка-фрылансер Кася Ляўдацкая і фатограф Ілля Гілей, які працуе ў межах рэгіянальнага інфармацыйнага бізнес-партала “Grodno.In”.

Пасля справаздачы адбылася прэзентацыя фотакалендара «Непадцэнзурная Гародня. 1983–2018», выдадзенага ў тым ліку намаганнямі сябраў ГА «БАЖ”. Каляндар стаўся вынікам аднайменнай выставы, што адбылася ў Гродне ў сакавіку 2018 года.

Напрыканцы адбылося тэатралізаванае віншаванне ўсіх прысутных з Калядамі і Новым годам супрацоўнікамі Гродзенскага дзіцячага хоспіса, дзейнасць якога асвятляюць мясцовыя журналісты.