Гродзенскія журналісты падалі заяву адносна фактаў гвалту з боку сілавікоў у дачыненні мірных жыхароў Гродна

У заяве журналісты выказваюць абурэнне неабгрутваным гвалтам з боку міліцыі і сілавых ведамстваў супраць мірных жыхароў Гродна, які адбыўся з 9 па 11 жніўня 2020 года.

Апроч гэтага яны заяўляюць, што маюць дзясяткі сведчанняў пра незаконныя затрыманні, ужыванне фізічнай сілы і спецсродкаў, тараны спецтэхнікай цывільных аўтамабіляў, незаконнае абмежаванне перасоўвання людзей, гвалт над людзьмі падчас затрыманняў і перабывання пад вартай.

У заяве прыведзены спіс журналістаў, якія былі незаконна затрыманыя і збітыя супрацоўнікамі міліцыі. У гэтым пераліку: Руслан Кулевіч (падчас затрымання зламалі абедзве рукі), Ян Роман і Алесь Дзянісаў (збітыя), Вольга Камягіна (прыніжэнне чалавечай годнасці). Сярод затрыманых таксама пазначаныя Ігар Бублікаў, Іна Грышук, Аляксей Кайрыс, Сяргей Людкевіч і Аляксандар Саенка.

Журналісты патрабуюць даць ім інфармацыю пра дакладную колькасць і імёны ўсіх затрыманых падчас мірных акцый пратэсту, пазначыць звесткі пра пакаранні іх і месцы цяперашняга знаходжання. Апроч гэтага, прадставіць дадзеныя пра ведамасную прыналежнасць і нумары падраздзяленняў, якія былі задзейнічаныя для затрымання, утрымання і транспартавання людзей, а таксама імёны і званні кіраўнікоў спецаперацыі затрымання людзей у Гродне.

Дадаткова журналісты просяць паведаміць ім інфармацыю пра колькасць пацярпелых і шпіталізаваных прадстаўнікоў сілавых ведамстваў падчас задушэння пратэстаў у Гродне.

Таксама гродзенскія журналісты запатрабавалі даць інфармацыю пра ўжо здзейсненыя і запланаваныя дзеянні, скіраваныя на расследванне фактаў незаконнага затрымання і прымянення фізычнага гвалту супраць прадстаўнікоў медыя і іншых мірных грамадзян.

Заяву падпісалі каля двух дзясяткаў гродзенскіх журналістаў.