Хто той «рэжысёр», які падманам стварыў фільм пра эміграцыю?

Аляксей Марцінёнак больш за 15 гадоў працуе ў структурах беларускага тэлебачання, але ніколі не быў на першых ролях. «Наша Ніва» расказвае пра яго.

Аляксей Марцінёнак у 2016 годзе. Скрыншот з тэлеканала СТБ

Аляксею Марцінёнку 37 гадоў. Па звестках Dig­i­tal Intel­li­gence Team, ён нарадзіўся і вырас у Мінску.

Вучыўся ў школе №177 ва Уруччы, дзе працавала ягоная маці, а пасля паступіў у Беларускі дзяржаўны аграрны ўніверсітэт.

У маладосці Марцінёнак захапляўся рокам, асабліва рускім. Напрыклад, у 2011 ён ездзіў на фестываль «Нашэсце» ў Цвярскую вобласць Расіі.

Тады рокеры выступалі ўсе разам. Напрыклад, у 2011 годзе на фестывалі сыходзіліся Ляпіс Трубяцкі, Воплі Відаплясава, Акіян Эльзы і гурты, якія цяпер горача падтрымліваюць расійскае ўварванне ва Украіну (напрыклад, Аліса, Серьга і Гарык Сукачоў). А на адной тэатральнай сцэне выступалі Вера Палазкова, унесеная цяпер за антываенную пазіцыю ў спіс тэрарыстаў, і Іван Ахлабысцін, які моліцца на Пуціна.

Марцінёнак трапіў на Беларускае тэлебачанне ў 2008 годзе. Спачатку ён працаваў на СТБ. Акрамя з’яўлення ў эпізадычных ролях у кадры, ён быў эканамістам фінансава-эканамічнага абгрунтавання.

Аляксей Марцінёнак вядзе перадачу «Пяць хвілін». Фота: Аднакласнікі

У 2016 перайшоў на працу ў Агенцтва тэленавін (АТН), але зоркай так і не стаў. Ён здымаецца ў спецпраектах агенцтва тэленавін, удзельнічае ў некаторых праектах. На канец 2024 года Марцінёнак быў на пасадзе палітычнага аглядальніка ў аддзеле аглядальнікаў галоўнай дырэкцыі АТН.

Цяпер яго вырашылі паспрабаваць на пасадзе рэжысёра. Падобна, што насамрэч рэжысёрскага досведу ў яго або зусім няма, або небагата.

Марцінёнак у складзе дэлегацыі беларускіх медыйшчыкаў у Кітаі ў 2012 годзе. Фота: en.people.cn