Як медыям камунікаваць пра свае фінансавыя праблемы? Разважае Барыс Гарэцкі

Спыненне падтрымкі ад ЗША паставіла ў складанае становішча многія медыя па ўсім свеце. Не абышла праблема і беларускія выданні, якія і без таго пазбаўленыя магчымасці сур’ёзна зарабляць з дапамогай рэкламы. У БАЖ прыходзяць калегі з запытам, як лепш камунікаваць пра гэтую сітуацыю са сваёй аўдыторыяй. Намеснік старшыні арганізацыі Барыс Гарэцкі дзеліцца развагамі на гэты конт.

Барыс Гарэцкі. Фота: БАЖ

Устойлівасць рэдакцый пад пагрозай. Аднак камунікаваць любыя складанасці свайго медыя — задача з зорачкай. Ты нібыта адкрываеш перад людзьмі капот уласнай машыны і паказваеш, як там усё уладкавана. І не толькі перад чытачамі, але і перад хэйтарамі і прапагандай.

Гэта важная і тонкая задача, але шчырасць і празрыстасць — ключ да таго, каб заваяваць падтрымку аўдыторыі.

У гэтай гісторыі ёсць і пазітыўныя бакі. Найперш тое, што сама рэдакцыя не вінаватая ў сітуацыі. Яна па-ранейшаму робіць якасны і важны кантэнт, а праблемы ўзніклі з‑за зменаў менавіта знешняга асяроддзя.  Вось некалькі стратэгій, як можна пісьменна і паспяхова паразмаўляць з аўдыторыяй.

Прамы і шчыры зварот

• Фармат: адкрыты ліст ад галоўнага рэдактара або каманды.
• Тон: шчыры, але без панікі — патлумачыць, што адбылося, чаму гэта важна і што трэба для выхаду з крызісу. Можна эксперыментаваць і не баяцца крыху жартаваць.

Прыклад: «Мы заўсёды імкнуліся заставацца незалежнымі, але цяпер перад намі стаіць складаная задача…»

 Кампанія падтрымкі

• Запуск краўдфандынгу: праз Patre­on, Boosty ці ўласную платформу падпіскі.
• Фармулёўка: патлумачыць, што чытачы — гэта частка супольнасці, і іх падтрымка дапамагае захоўваць незалежную журналістыку.

Важна: прапанаваць празрыстыя ўзроўні падпіскі — ад сімвалічных сум да буйных унёскаў з бонусамі (напрыклад, згадка донараў, мерч).

Пазітыўны прыклад — колішняя інфармацыйная кампанія выдання Reform.news. Пакуль многія медыя спрабавалі залатаць дзіры сваімі высілкамі і не казаць пра складанасці, калегі з Reform пад пагрозай закрыцця першымі адкрыта папрасілі чытачоў падтрымаць іх. Кампанія спрацавала, грошы былі сабраныя.

Ключавымі фактарамі, на мой погляд, былі: запуск першымі і шчырасць камунікацыі.

Кантэнт пра закуліссе медыя (калі гэта прымальна)

• Ідэя: публікаваць серыю матэрыялаў пра тое, як ствараецца кантэнт, якія выдаткі мае рэдакцыя, чаму незалежная журналістыка патрабуе падтрымкі.
• Мэта: уцягнуць аўдыторыю, каб яны адчувалі, што падтрымліваюць не абстрактнае «выданне», а людзей, якія робяць важную справу.

Канешне, прам усю «унутранку» публічыць не раю. Разумныя правілы бяспекі яшчэ ніхто не адмяняў. 

Больш нефармальныя зварот можна зрабіць праз сацыяльныя сеткі.

• Фармат: відэазвароты ад рэдакцыі, інтэрактыўныя сесіі з падпісчыкамі (Q&A, стрымы).
• Тон: сяброўскі, з акцэнтам на сілу супольнасці.

 З тымі жа задачамі добра справіцца E‑mail-рассылка.

• Калі ў выдання ёсць рассылка, можна даслаць ліст падпісчыкам з заклікам падтрымаць выданне, дапоўнены рэальнымі гісторыямі і прыкладамі матэрыялаў, якія ўдалося зрабіць дзякуючы аўдыторыі.

Ці існуе панацэя?

Зразумела, пералічаныя прапановы — не панацэя. Але дадатковую тысячу, а то і дзясятак тысяч любімай рэдакцыі могуць прынесці.

Галоўнае — захаваць павагу да сваёй аўдыторыі, не драматызаваць, а паказаць, што яны — частка гэтага праекта. Тут узгадваецца мерч для данатараў ад Беларускага расследвальніцкага цэнтру з надпісам «Ганаровы падзельнік».

Дарэчы, падтрымаць БАЖ можна тут 🙂