«Экстрэмісцкі» спіс Мінінфарма: Telegram-канал Віталя Цыганкова, YouTube-канал MozgON і іншыя інтэрнэт-рэсурсы
Міністэрства інфармацыі Беларусі 3 красавіка ўнесла ў «Рэспубліканскі спіс экстрэмісцкіх матэрыялаў» Telegram-канал журналіста Віталя Цыганкова, YouTube-канал MozgON, які вёў палізняволены блогер Уладзімір Цыгановіч, Facebook-акаўнт «Радыё Свабода»і шэраг іншых інтэрнэт-рэсурсаў.

Уладзімір Цыгановіч
Суд Ленінскага раёна Брэста 31 сакавіка 2025 года прыняў рашэнне прызнаць «экстрэмісцкай інфармацыйнай прадукцыяй» Telegram-канал «Цыганкоў» (ідэнтыфікатар t.me/tsyhankou). Стваральнік гэтага рэсурса — вядомы беларускі журналіст Віталь Цыганкоў, на яго Telegram-канал падпісаныя 641 чалавек.
У той самы дзень суд Ленінскага раёна Брэста пастанавіў лічыць «экстрэмісцкай інфармацыйнай прадукцыяй» старонку з назвай «Радыё Свабода» ў сацсетцы Facebook (ідэнтыфікатар facebook.com/svaboda.org). Раней, у снежні 2023 года, рашэннем суда Чыгуначнага раёна Гомеля «экстрэмісцкімі» былі абвешчаныя сайт і іншыя рэсурсы гэтага СМІ. 23 снежня 2021 года Міністэрства ўнутраных спраў Беларусі абвесціла медыя «Радыё Свабода» «экстрэмісцкім фармаваннем».
Таксама 31 сакавіка 2025 года суд Ленінскага раёна Брэста прызнаў «экстрэмісцкім» Telegram-акаўнт «Хартия 97%» з ідэнтыфікатарам (t.me/charter97org). На яго падпісаны 269 чалавек.
Паводле рашэння суда Кастрычніцкага раёна Віцебска ад 1 красавіка 2025 года ў «экстрэмісцкі» спіс уключылі YouTube-канал MozgON, які мае 51,7 тысяч падпісчыкаў (ідэнтыфікатар youtube.com/@MozgON).
Стваральнік рэсурса — палітычны вязень Уладзімір Цыгановіч. У снежні 2021 года блогера асудзілі да 15 гадоў зняволення ў калоніі ўзмоцненага рэжыму. Тады Цыгановіча прызналі вінаватым паводле ч. 1 арт. 293 Крымінальнага кодэкса (арганізацыя масавых беспарадкаў) і арт. 130 Крымінальнага кодэкса (распальванне варожасці ці варажнечы). Ужо ў зняволенні яго яшчэ тройчы судзілі паводле ч. 2 арт. 411 Крымінальнага кодэкса (злоснае непадпарадкаванне патрабаванням адміністрацыі калоніі). Яму дадалі да ранейшага тэрміну яшчэ год і перавялі адбываць прысуд з калоніі ў турму.
