• Актуальнае
  • Медыяправа
  • Карыснае
  • Кірункі і кампаніі
  • Агляды і маніторынгі
  • Рэкамендацыі па бяспецы калег

    «Экстрэмісцкі» спіс Мінінфарма: Telegram-канал «Витебские вести» і сайт «Цэнтра новых ідэй»

    Міністэрства інфармацыі Беларусі ўвечары 2 красавіка абнавіла Рэспубліканскі спіс экстрэмісцкіх матэрыялаў. У пералік забароненых да распаўсюду інфармацыйных рэсурсаў дадалі Telegram-канал самвыдатаўскага бюлетэня «Витебские вести», а таксама сайт і сацсеткі даследчага інстытута «Цэнтр новых ідэй».

    Выява створана БАЖ з выкарыстаннем Chat­G­PT

    Паводле рашэння суда горада Жодзіна ад 27 сакавіка 2025 года «экстрэмісцкай інфармацыйнай прадукцыяй» празнаны змест Telegram-канала «Витебские вести» (ідэнтыфікатар t.me/Vitebsk_vesti). Канал не абнаўляецца з зімы 2022 года і ў яго толькі 42 падпісчыкі.

    Гэты рэсурс мае такую ж назву, як Telegram-канал віцебскага абласнога дзяржаўнага выдання, але быў створаны для распаўсюду pdf-версій аднайменнага самвыдатаўскага бюлетэня.

    Бюлетэнь «Витебские вести» ўзнік у 2021 годзе — тады па ўсёй Беларусі пачалі выходзіць самвыдатаўскія дайджэсты з навінамі недзяржаўных СМІ. Іх знарок называлі на ўзор афіцыйных выданняў, каб больш бяспечна пачуваліся валанцёры, якія распаўсюджвалі выданні па паштовых скрынях.

    На Віцебшчыне выходзілі два самвыдатаўскія бюлетэні:  «Витебские вести» і «Витебский вестник». Паводле абвінавачання, да выхаду апошняга меў дачыненне палітзняволены журналіст Андрэй Фамін, асуджаны да 7 гадоў пазбаўлення волі. Сетка самвыдату была прызнаная «экстрэмісцкім фармаваннем».

    31 сакавіка 2025 года суд Ленінскага раёна Гродна прызнаў «экстрэмісцкімі матэрыяламі» сайт «Цэнтра новых ідэй» (ідэнтыфікатар https://newideas.center) і яго старонкі ў сацсетках. У Рэспубліканскі спіс экстрэмісцкіх матэрыялаў уключаныя акаўнты з назвай «Цэнтр новых ідэй» у Face­book, Insta­gram, «ВКонтакте», LinkedIn, а таксама аднайменныя Telegram- і YouTube-каналы.

    Цэнтр новых ідэй — гэта грамадская структура, якая займаецца даследаваннямі і аналітыкай у сферах палітыкі, сацыялогіі, медыя і інш. У прыватнасці, ладзіць адукацыйныя праграмы для моладзі і спрыяе распаўсюду якаснай і неперадузятай інфармацыі пра Беларусь у замежжы. Сёлета ў сакавіку КДБ Беларусі абвесціў каманду ЦНІ «экстрэмісцкім фармаваннем».

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці