«Экстрэмісцкімі матэрыяламі» прызналі сацсеткі анлайн-выдання «Медыя-Палессе»

Міністэрства інфармацыі Беларусі 28 ліпеня ў чарговы раз абнавіла Рэспубліканскі спіс экстрэмісцкіх матэрыялаў. Гэтым разам яго папоўнілі старонкамі незалежнага рэгіянальнага выдання «Медыя-Палессе».

Скрыншот сайта

Паводле рашэння суда Лунінецкага раёна Брэсцкай вобласці ад 25 ліпеня 2025 года ў спіс уключаныя акаўнт «Медиа-Полесье» ў сацыяльнай сетцы «ВКонтакте» (ідэнтыфікатар vk.com/mediapolesye_by) і акаўнт «Медиа Полесье» ў сацыяльнай сетцы «Одноклассники» (ідэнтыфікатар ok.ru/profile/563146873193). 

Старонкі выдання ў гэтых сацсетках трапілі ў Рэспубліканскі спіс экстрэмісцкіх матэрыялаў ўжо другі раз: упершыню гэта здарылася ў красавіку 2022 года.  

Сайт выдання media-polesye.com быў прызнаны «экстрэмісцкай» інфармацыйнай прадукцыяй 16 красавіка 2025 года. 18 траўня 2024 года «экстрэмісцкай» была абвешчаная  старонка «Медиа-Полесье» ў Faсe­book. 22 ліпеня 2024 года ўлады прызналі «экстрэмісцкім» YouTube-канал медыя.  

Ціск на незалежнае анлайн-выданне «Медыя-Палессе» цягнецца ўжо некалькі гадоў. У ліпені 2021 года ў офісе рэдакцыі ў Лунінцы, па месцы жыхарства галоўнай рэдактаркі Святланы Гарда, а таксама ў некаторых супрацоўнікаў сайта сілавікі зладзілі ператрусы. У верасні таго ж года доступ да сайта media-polesye.by на тэрыторыі Беларусі быў заблакаваны на загад Міністэрства інфармацыі. У красавіку 2024 года Аператыўна-аналітычны цэнтр (ААЦ) пазбавіў незалежны сайт даменнага імя ў нацыянальнай зоне .by.