Навіны

Мэр Кіева Віталь Клічко раніцай 29 красавіка паведаміў, што ў выніку трапляньня расейскай ракеты ў шматпавярховік у Шаўчэнкаўскім раёне Кіева загінуў адзін чалавек. Пасьля стала вядома імя — гэта журналістка ўкраінскай службы Радыё Свабода Вера Гірыч.

Прэмія шведскай філіі арганізацыі «Рэпарцёры без межаў» «Свабода прэсы 2022» прысуджаецца Беларускай асацыяцыі журналістаў. Прэмія будзе ўручаная ў сувязі з Міжнародным днём свабоды прэсы 3 траўня.

У сваякоў журналістаў і рэдактараў, якія знаходзяцца ў СІЗА на Валадарскага, бяруць падпіскі аб невыдаваньні. І людзі, якія раней расказвалі журналістам, што пішуць іхныя дзеці, у якіх умовах утрымліваюцца, цяпер асьцерагаюцца дзяліцца навінамі, бо зьвязаныя гэтымі падпіскамі. Свабода ведае прынамсі чатыры такія выпадкі сярод родных зьняволеных журналістаў. Галоўная рэдактарка папулярнага парталу Марына Золатава на Валадарцы чытае «Гары Потэра». Фрылансэр Свабоды Андрэй Кузьнечык чакае суду, Алег Грузьдзіловіч — разгляду апэляцыі на прысуд у Менскім гарадзкім судзе.

Міжнародная кампанія Adevinta, якая спецыялізуецца на анлайн-аб'явах, абвясціла аб сваім сыходзе з беларускага рынку. Сваю пляцоўку па размяшчэнні аб'яў у Беларусі «Куфар» кампанія перадае існуючай мясцовай камандзе, паведамляе reform.by.

Беларуская асацыяцыя журналістаў названая лаўрэатам Сусветнай прэміі ЮНЭСКА / Гільерма Кано за ўнёсак у свабоду прэсы. Такое рашэнне 27 красавіка агучыла журы прэміі.