Навіны

9 лістапада стала вядома, што прыватная друкарня «Палікрафт» прымусова знішчыла наклад кнігі Віталя Сіліцкага «Доўгая дарога ад тыраніі: посткамуністычны аўтарытарызм і барацьба за дэмакратыю ў Сербіі і Беларусі». Дырэктар друкарні Фёдар Басько пацвердзіў «Нашай Ніве», што кнігі былі знішчаныя на загад Мінінфармацыі пад пагрозай закрыцця друкарні. Начальнік упраўлення выдавецкай дзейнасці і гандлю Міністэрства інфармацыі Алена Паўлава заявіла прэс-службе ГА “БАЖ”, што нічога не ведае пра якія-кольвек рашэнні адносна кнігі. Пра папярэднюю экспертызу кнігі нідзе не паведамлялася.

26 лістапада актывіста Кансерватыўна-хрысціянскай партыі БНФ Алеся Чахольскага выклікалі ў аддзяленне міліцыі Фрунзенскага раёна г. Мінска, дзе далі азнаёміцца з пратаколам па арт.17.11 КаАП (выраб, распаўсюд і (або) захоўванне экстрэмісцкіх матэрыялаў). Пасля гэтага сп-ра Чахольскага адразу ж даставілі ў суд Фрунзенскага раёна. У выніку пратакол адправілі на дапрацоўку, а працэс адклалі, — паведаміла Радыё Свабода.

На магілёўскіх заводах працаўнікам настойліва раяць падпісацца на мясцовую дзяржаўную прэсу, паведамляе праваабарончы рэсурс mahilyowspring.org.

  «Прэс-клуб Беларусь» запрашае на лекцыю Януша Ансіёна (Польшча). Лістападаўская сустрэча ў “Прэс-клубе Беларусь” – для менеджараў друкаваных медыя і ўсіх, хто цікавіцца новымі тэхналогіямі ў медыяменеджмэнце.