Адміністрацыя Трампа ўсталюе новыя правілы доступу СМІ ў Белы дом

Адміністрацыя прэзідэнта ЗША Дональда Трампа ўвядзе новыя правілы доступу прадстаўнікоў медыяў у Белы дом. Пра гэта паведаміла прэс-сакратарка Белага дома Кэралайн Лівіт 25 лютага, піша «Медуза».

Белы дом. Фота: Matt H. Wade / Вікіпедыя

Выступаючы на ​​брыфінгу перад журналістамі, Лівіт сказала, што дзесяцігоддзямі Асацыяцыя карэспандэнтаў Белага дома ўстанаўлівала, якія журналісты «могуць задаваць пытанні прэзідэнту Злучаных Штатаў у гэтых самых патаемных месцах». У далейшым, сказала прэс-сакратарка, склад прэс-пула будзе вызначаць прэс-група Белага дома.

«Старыя выданні, якія ўдзельнічалі ў прэс-пуле на працягу дзесяцігоддзяў, па-ранейшаму будуць мець магчымасць далучыцца да яго, але мы таксама дамо гэты прывілей дастойным выданням, якія раней ніколі не мелі магчымасці падзяліць гэтую дзіўную адказнасць», — сказала Лівіт.

Прэс-сакратарка адміністрацыі Трампа не ўдакладніла, якія медыі атрымаюць доступ у Белы дом.

Адміністрацыя прэзідэнта ЗША раней у лютым абмежавала доступ журналістаў агенцтва Asso­ci­at­ed Press у Авальны кабінет і на борт прэзідэнцкага самалёта. Забарону ўвялі пасля таго, як агенцтва адмовілася называць Мексіканскі заліў Амерыканскім.

Пазней стала вядома, што суд адхіліў запыт Asso­ci­at­ed Press неадкладна аднавіць поўны доступ да Белага дома для журналістаў Asso­ci­at­ed Press. Суддзя адзначыў, што абмежаванне распаўсюджваецца на доступ да «больш прыватных зон» прэзідэнта ЗША, але прызнаў, што Белы дом дыскрымінаваў AP з‑за іх рэдакцыйнай палітыкі.

Пасля прыняцця рашэння Белы дом выступіў з заявай, у якой адзначыў, што магчымасць задаваць пытанні прэзідэнту ЗША ў Авальным кабінеце і на борце Air Force One «з’яўляецца прывілеем журналістаў, а не іх законным правам». Прадстаўнік AP заявіў, што агенцтва «будзе працягваць абараняць права прэсы і грамадскасці свабодна выказвацца без мер урада».