Пасля васьмі дзён маўчання аднавілі працу сайт і канал «Народнай Волі». Ад назвы засталося толькі «НВ»
8 жніўня 2023
Пасля перапынку ў працы і змены ўласніка абнавіўся сайт былога выдання «Народная Воля» і тэлеграм-канал, заўважыла «Наша Ніва».
Сайт nv-online.info змяніў лагатып, назвы «Народная Воля» на ім больш няма — ёсць дзве літары «НВ».
На сайце пазначана, што ён быў зарэгістраваны ў рэестры ў БелДІЭ Рэспублікі Беларусь 8 жніўня 2023.
Тэлеграм-канал таксама змяніў назву на «НВ-ОНЛАЙН».
4 жніўня стала вядома, што Іосіф Сярэдзіч пакідае пасаду галоўнага рэдактара «Народнай Волі». Ён узначальваў выданне амаль 30 гадоў.
Іосіф Сярэдзіч таксама паведаміў, што правы ўласніка сайта nv-online.info ён перадаў іншай асобе, імя яе не называлася.
Рэдакцыя «Народнай Волі» была вымушаная спыніць друк газеты ў лістападзе 2020 года пасля таго, як улады забаранілі з ёй супрацоўнічаць усім беларускім друкарням і перакрылі магчымасці друкавацца за мяжой.
Газета выдавалася ў PDF-фармаце, але ў пачатку 2023 года было прыпынена і гэта, а ў чэрвені Мінінфарм ануляваў пасведчанне аб рэгістрацыі. 31 ліпеня перастаў абнаўляцца сайт выдання.
Чытайце яшчэ:
Іосіф Сярэдзіч: «Калі б у 1995‑м дэпутаты абаранілі «Народную газету», можа, па-іншаму развіваліся б падзеі»
«Змагарскі брэнд, як Пазняк». Што такое «Народная воля» і хто такі Сярэдзіч, які сышоў з газеты
Нейрасеткі рулююць і на дзяржТБ: тут з’явіўся лічбавы тэлевядоўца
@bajmedia
