Пытанні беларускіх журналістаў прагучаць адразу ў чатырох заявах з’езда Еўрапейскай федэрацыі журналістаў

2–3 чэрвеня Беларуская асацыяцыя журналістаў прымае ўдзел у чарговым гадавым кангрэсе Еўрапейскай федэрацыі журналістаў. Пытанні беларускіх журналістаў прагучаць адразу ў чатырох дакументах з’езда.

З’езд ЕФЖ у 2024 годзе. Фота: БАЖ

Так неабходнасць падтрымкі беларускіх калег згадваецца ў заяве, прапанаванай журналісцкімі саюзамі SNJ-CGT (Францыя), AJK (Косава) і DJ (Данія), у заяве аб падтрымцы незалежных медыя ад Журналісцкага аб’яднання з Польшчы, а таксама ў заяве ад Польскай асацыяцыі журналістаў.

Безумоўна, галоўнае апісанне сітуацыі і патрабаванне вызвалення журналістаў з‑за кратаў, а таксама заклік да ўсебаковай падтрымкі прадстаўнікоў незалежнага медыясектара прагучыць у заяве ЕФЖ, падрыхтаванай БАЖ.

Еўрапейская федэрацыя журналістаў з’яўляецца блізкім партнёрам БАЖ у справе адстойвання правоў журналістаў і медыя. За прайшоўшы з мінулага з’езду год, прэзідэнтка ЕФЖ Мая Север прыняла ўдзел у цырымоніі ўзнагароджання лаўрэатаў конкурсу «Вольнае слова», а прадстаўнікі і прадстаўніцы БАЖ былі спецыяльнымі гасцямі журналісцкага фестывалю VOICES.

А год таму, на з’ездзе Еўрапейскай федэрацыі журналістаў, прадстаўнікі і прадстаўніцы журналісцкіх саюзаў прынялі ўдзел у акцыі салідарнасці.