Рыгор Кастусёў адзначыў 65-гадовы юбілей у СІЗА

Пазней стала вядома, што Рыгор Кастусёў, палітоляг Аляксандар Фядута і юрыст Юры Зянковіч абвінавачаныя ў змове з мэтай захопу дзяржаўнай улады неканстытуцыйным шляхам (ч. 1 арт. 357 Крымінальнага кодэкса).

Спачатку Кастусёў знаходзіўся пад арыштам у СІЗА КДБ, пазней палітыка перавялі ў СІЗА № 1 на вуліцы Валадарскага ў Мінску. Падчас знаходжання Рыгора Андрэевіча за кратамі ўрачы дыягнаставалі ў яго анкалагічнае захворванне. Аднак, нягледзячы на гэты дыягназ, меру ўтрымання яму праваахоўнікі так і не змянілі.

Жонка палітыка Ларыса Кастусёва паведаміла нашаму карэспандэнту, што днямі палітыку працягнулі тэрмін утрымання пад вартай яшчэ на два месяцы — да 12 чэрвеня 2022 года. Пры гэтым сам Кастусёў піша, што ўжо на працягу некалькіх месяцаў у дачыненні да яго не праводзіцца ніякіх следчых дзеянняў.

У сваіх лістах Рыгор Кастусёў паведамляе, што імкнецца штодня выходзіць на шпацыр, каб хоць гадзіну пабыць на вуліцы і падыхаць свежым паветрам. Паводле палітыка, ён шмат чытае, імкнецца адсочваць падзеі ў Беларусі і свеце па тэлевізійных праграмах.

У адным з апошніх лістоў жонцы Рыгор Андрэевіч распавёў, што замовіў у турэмнай бібліятэцы падручнік нямецкай мовы: каб крыху “аднавіць амаль страчаныя веды”. Ларыса Кастусёва кажа, што апошнім часам муж наракае на тое, што значна скарацілася колькасць лістоў ад сяброў і знаёмых, яны “губляюцца” дзесьці па дарозе.

Праваабарончая супольнасць Беларусі прызнала Рыгора Кастусёва палітвязнем.

Коллеги в тюрьмах. Напишите им письмо поддержки АКТУАЛЬНЫЕ АДРЕСА