Сцяпан Пуціла вяртаецца на «Белсат». Хто яшчэ з’явіцца ў новым сезоне на тэлеканале?

Адзіны беларускамоўны тэлеканал «Белсат» пачынае новы сезон з яшчэ большаю колькасцю праграмаў. У восеньскім сезоне іх будзе 16, у тым ліку 4 цалкам новыя. Кіраўніцтва тэлеканалу прыадкрывае таямніцы будучых праектаў.

 

Ньюсрум тэлеканалу «Белсат». Варшава, Польшча. 23 студзеня 2025 года. Фота: Белсат

Новая праграма і… знаёмы твар 

На «Белсат» вяртаецца Nex­ta! Нашыя адданыя гледачы памятаюць, што раней Сцяпан Пуціла рабіў аўтарскую праграму на «Белсаце». Мінула некалькі гадоў – і вось Nex­ta зноў з намі. І таксама з аўтарскаю праграмаю – «ПраБел». Nex­ta на «Белсаце». Без сухіх навінаў і з процьмаю вострых жартаў, трапных паралеляў і нечаканых дэталяў, якія закрануць сутнасць. Аўтар праграмы пакажа ўлады праз абсурд, прапаганду разаб’е відэафактамі, а пра сур’ёзныя тэмы апавядзе простаю моваю з кропелькай іроніі.

«Усё будзе падавацца лёгка, смела і з гумарам, які дапамагае глядзець на рэчаіснасць інакш – праз надзею і ўсмешку. Бо смех – гэта зброя супраць страху», – зазначаюць стваральнікі праграмы.

Сцяпан Пуціла. Фота прадстаўленае аўтарам праграмы

Разбураем міфы пра здароўе 

«Без рэцэпту з доктарам Белавешкіным» – такога на «Белсаце» яшчэ не было! Хто з нас час ад часу не пытае ў «Google» альбо «Chat­G­PT», што значыць пэўны паказнік аналізу? Каго з нас не чапляе рэклама «схуднець на 20 кіляў за 3 месяцы без высілкаў» ці «як памаладзець на 10 гадоў, робячы адное практыкаванне на тыдзень»? Акурат гэтая новая праграма і будзе развенчваць міфы пра здароўе і даваць сапраўды карысныя ды практычныя парады, як падтрымаць сябе ў добрай ментальнай і фізічнай форме. Весці праграму будуць кандыдат медычных навук Андрэй Белавешкін і трэнерка Надзея Дамкоўская. Будзем здаровыя разам з «Белсатам»! 

Андрэй Белавешкін. Фота:belaveshkin / Telegram

«Тут і там» з Алесем Залеўскім і Змітром Міцкевічам 

Ад абмеркаванняў бягучых падзеяў да сур’ёзнай аналітыкі. Складана ўявіць сабе тэмы, якія не будуць абмяркоўвацца ў новай праграме «Тут і там». Што думаюць, ад чаго пакутуюць і як збіраюцца змагацца з канкрэтнымі праблемамі беларусы, украінцы, расейцы, палякі, літоўцы? Як нам паразумецца адно з адным? Як пабудаваць масты паміж краінамі? Дыялог – тое, чаго нам усім не стае і што дакладна будзе ў новай праграме «Тут і там». 

Журналіст «Белсату» Алесь Залеўскі. Варшава, Польшча, 18 студзеня 2025 года. Фота: Белсат

«Эбэргарт і Кацэвіч на Усходзе» 

«Выбітны польскі палітолаг Адам Эбэргарт і рэдактар польскай рэдакцыі «Белсату» Міхал Кацэвіч у аўтарскай праграме «Эбэргарт і Кацэвіч на Усходзе» абмяркуюць самыя вострыя справы, якія датычаць дзяржаваў на ўсход ад Польшчы – найперш Беларусі, Украіны і Расеі», – адзначае намеснік кіраўніцы рэдакцыі беларускамоўных інфармацыйных праграмаў «Белсату», шматгадовы вядоўца праграмы «ПраСвет» і дакументаліст Сяргей Пеляса. 

Праграма будзе весціся па-польску з перакладам на беларускую мову. 

Палітычны аглядальнік і вядоўца падкасту «Эбэргарт і Кацэвіч. На Усходзе» Міхал Кацэвіч (Michał Kacewicz). Варшава, Польшча. 12 чэрвеня 2025 года. Фота: Рауль Дзюк / Белсат

Новыя вядоўцы, але без коцікаў 

Гэта яшчэ не ўсе навінкі і цікавінкі, якія чакаюць нашых гледачоў. Гэтак, у ранішнім шоу «Раніца з «Белсатам» з’явіцца новая пара вядоўцаў: Святлана Зелянкоўская і Алег Ціткоў. Яны далучацца да ўжо знаёмых вам Аліны Коўшык і Анатоля Шырвеля, а таксама Кацярыны Раецкай і Дзяніса Дудзінскага. 

Вядоўцы Дзяніс Дудзінскі і Кацярына Раецкая падчас пробаў шоў «Раніца з Белсатам». Варшава, Польшча. 9 сакавіка 2025 года. Фота: Белсат

Адбудуцца змены і ў праграме «Вусы Скарыны». Па-першае, называцца яна будзе «Вусы сармата». А па-другое, замест коцікаў будуць… А вось хто будзе весці праграму разам з Цімохам Акудовічам, пабачыце самі. 

Цімафей Акудовіч прамаўляе падчас сустрэчы з зоркамі «Белсату» ў рамках фестывалю «Tuta­ka». Гарадок, Польшча. 12 ліпеня 2025 года. Фота: Рауль Дзюк / Белсат

«Тэлебачанне для тых, хто хоча бачыць праўду» 

«Дарагія сябры, гэтаю восенню я асабліва хачу запрасіць вас уключаць «Белсат». Гэта месца, дзе мы разам глядзім на падзеі ў Беларусі і свеце нашымі вачыма без масак ды прыгожых фільтраў. Тут гучыць беларуская мова, жывуць нашыя гісторыі і людзі, якія, нягледзячы ні на што, трымаюцца сваёй годнасці, – адзначае кіраўніца «Белсату» Аліна Коўшык.

– Сёлета «Белсату» спаўняецца ўжо 18 гадоў. Гэта ўзрост даросласці і адказнасці, і мы ганарымся тым, што ўсе гэтыя гады былі і застаемся побач з вамі. У новым сезоне мы падрыхтавалі праграмы, сустрэчы і адкрыцці, якія натхняюць і яднаюць нас. Мы ствараем тэлебачанне для тых, хто хоча бачыць праўду, чуць розныя галасы і адчуваць сябе часткаю вялікай супольнасці, якая не губляе надзеі і веры ў будучыню. Гэта наш канал, і ён для нас».