«Газета Слонімская» дапамагала сабраць падарункі землякам

Адной з першых свой падарунак атрымала васьмігадовая Насця Строк

Дзяўчынка ў раннім узросце сур’ёзна захварэла і, на жаль, не можа хадзіць і размаўляць. Напярэдадні святаў ўдзельнікі акцыі «Дары дабро!» для Настассі перадалі падарунак: плюшавае сэрца-падушку, прысмакі і дзіцячыя рэчы. Больш за ўсё дзяўчынцы спадабалася цацка, Насця цягнулася да яе ручкамі, прыкладваліся галавой на мяккую падушку.

«Дзякуй усім, хто мае дачыненне да акцыі. Дзякуючы вашай увазе і дапамозе жыццё нашай сям’і становіцца ў разы больш шчаслівым», — выказала свае словы ўдзячнасці мама Насці Святлана.

Для Настассі патрэбны дзіцячы інвалідны вазок, які каштуе каля 26 мільёнаў рублёў (недамінаваных). Збор сродкаў працягваецца. Усе ахвотныя дапамагчы могуць патэлефанаваць па тэлефоне 8–044-73–69-154 або напісаць на электронны адрас shinkilabelar@gmail.com.

Таксама выказваем падзяку сем’ям Міцкевіч, Масюк, Томей-Ганчарук за перададзеныя падарункі.

У гасцях у Захара Белякова

Дзевяцігадовы Захар Белякоў са Слоніма шчыра верыць у Дзеда Мароза, таму штогод просіць у яго прынесці пад елачку падарункі. Добры хлопчык, у якога сур’ёзныя праблемы са здароўем, не забывае і пра сваіх родных. У прыватнасці, пра сястрычку Дашу, якой вельмі патрэбныя ад казачнага Дзеда ўсякія дзявочыя заколкі-банцікі. Таму ў спіс жаданняў ўключае не толькі свае, але і сям’і …

У гэтым годзе Захару вельмі пашанцавала: адразу пяць Дзядоў Марозаў прыйшло да хлопчыка ў госці. Праўда, усе яны безбародыя і ўжо такія знаёмыя.

Павіншаваць хлопчыка прыйшлі трэнеры футбольнага клуба «Слонім», галоўным заўзятарам якога з’яўляецца Захар. Мужчыны далучыліся да дабрачыннай акцыі «Дары дабро!» і падарылі сям’і Белякова сапраўднае свята душы. З найлепшымі пажаданнямі трэнеры падарылі дзіцяці падарункі, якія так ці інакш тычацца захаплення футболам. Ад галоўнага трэнера ФК «Слонім» Аляксея Шубянка хлопчык атрымаў самую сапраўдную футбольную форму, шалік.

Валанцёры акцыі «Дары дабро!» Перадалі Захару свае падарункі: размалёўкі, фламастэры, цацку, цукеркі, а таксама календары «ГС».

«Захар быў вельмі рады такому сюрпрызу. Толькі дзякуючы ўвазе з боку трэнераў ФК «Слонім», а таксама іншых неабыякавых людзей у жыцці нашай сям’і сталі адбывацца сапраўдныя цуды. Мы шчаслівыя ад вашай увагі! Нізкі вам паклон!» — падзякавала ўсім удзельнікам дабрачыннай акцыі «Дары дабро!» Мама Захара Наталля Белякова.