Як бабруйскія журналісты навучылі штучны інтэлект маляваць баброў і пісаць музыку

Беларускія медыі пачалі больш актыўна карыстацца штучным інтэлектам. Гэта можна заўважыць на прыкладзе бабруйскага сайта 1387.io.

Выява баброў, створаная з дапамогай штучнага інтэлекту. Крыніца: 1387.io

Штучны інтэлект паступова становіцца неад’емнай часткай беларускіх медыяў. Сёння журналісты выкарыстоўваюць Chat GPT пераважана для апрацоўкі баз дадзеных, стварэння малюнкаў і графікі, а часам нават раяцца з ім як з псіхолагам. Але штучны інтэлект – гэта не толькі Chat GPT.

БАЖ адшукаў на прасторах інтэрнэту бабруйскае выданне 1387.io, якое актыўна карыстаецца сучаснымі тэхналогіямі. Нейрасеткі ствараюць мазаіку з бабруйскім каларытам, малююць баброў у стылі сусветных і мясцовых мастакоў і нават пішуць музыку да аўдыёпраектаў.

Мы папрасілі прааналізаваць кантэнт выдання Змітра Смірнова — аўтара telegram-канала пра выкарыстанне ШІ ў медыях Easy AI.

У праекце «МедыяНаватары» БАЖ расказвае пра тое, як беларускія незалежныя медыі шукаюць свае формы, зместы, мадэлі і тэхналогіі. Ствараюць новыя праекты і прымаюць нестандартныя рашэнні. І, нягледзячы ні на што, развіваюцца. Гэта гісторыі пошуку і знаходак кожнай асобнай рэдакцыі і ўсяго беларускага медыясектрару разам.

Мазаіка ў бабруйскім стылі ад Chat GPT

На сайце 1387.io існуе Віртуальны музей мазаікі. Паводле эксперта, база фотаздымкаў з Віртуальнага музея выкарыстаная для стварэння ўнікальнага візуальнага кантэнта: аўтары кастамізавалі Chat GPT пры дапамозе выяваў бабруйскіх мазаік і далі яму задачу — генераваць выявы ў падобным стылі.

Ілюстрацыя створаная з выкарыстаннем чату GPT. Фота з сайта 1387.io

Ілюстрацыя створаная з выкарыстаннем чату GPT. Фота з сайта 1387.io

Ілюстрацыя створаная з выкарыстаннем чату GPT. Фота з сайта 1387.io

Як кажа Зміцер Смірноў, гэта не так цяжка зрабіць. Трэба загрузіць у Chat GPT базу фотаздымкаў і даць штучнаму інтэлекту падрабязныя інструкцыі – які прадукт павінен атрымацца на выхадзе.

На думку спецыяліста, Chat GPT не малюе бабруйскую мазаіку, а стварае візуал у стылістыцы бабруйскай мазаікі.

Бабры, многа баброў – у стылі Далі, Ван Гога, Рабкіна…

Стварэнне бабруйскай мазаікі – не адзіны варыянт прымянення штучнага інтэлекту ў выданні. На старонках сайта мы знайшлі цэлыя галерэі выяваў бабра, які з’яўляецца сімвалам горада Бабруйск.

Так штучны інтэлект бачыць спалучэнне бабра з асабняком купчыхі Кацнельсон. Выява з сайта 1387.io

Па просьбе журналістаў штучны інтэлект запусціў баброў у космас. Выява з сайта 1387.io

Баброў маляваў сэрвіс midjourney.com. Гэта праграма і служба стварэння генератыўнага штучнага інтэлекту, якая робіць выявы на падставе апісанняў на натуральнай мове чалавека.

А вось бабры ў стылі бабруйскага мастака Анатоля Концуба. Выява з сайта 1387.io

І нарэшце бабры, створаныя пад уплывам творчасці Абрама Рабкіна. Выява з сайта 1387.io

Сайт 1387.io пры дапамозе гэтага інструмента стварыў цэлую галерэю баброў у стылі сусветных і мясцовых мастакоў – то-бок пры дапамозе штучнага інтэлекту спалучыў вядомыя мастацкія творы з гарадскім сімвалам.

Музыка для «Міфічнага Бабруйска»

Вядома, што калектыў сайта робіць на YouTube гістарычны аўдыёпраект «Міфічны Бабруйск» (выйшлі ўжо 6 выпускаў падкаста). Музыка да праекта ствараецца пры дапамозе штучнага інтэлекту.

«Ніколі не думалі, што наш горад такі цікавы». Беларускі стварылі падкаст пра міфы і легенды Бабруйска

Напрыклад, у 6 выпуску «Міфічны Бабруйск. Самая страшная турма імперыі» расказваецца гісторыя знакамітай Бабруйскай крэпасці. На працягу ўсяго аўдыёпадкаста гучыць музыка, створаная SUNO AI. І досыць арганічна ўпісваецца ў стылістыку гісторый.

Сайт абавязкова ўказвае аўтарства штучнага інтэлекту.

Даведка. Праект 1387.io створаны ў 2023 годзе. Гэта выданне пра Бабруйск і бабруйцаў. Як указана на сайце, гэта пляцоўка для ўсіх, хто любіць горад. Рэсурс расказвае пра людзей і важныя мясцовыя падзеі, урбаністыку, экалогію, адукацыю, гісторыю.