«Голас Амерыкі» павінен аднавіць працу — так рашыў амерыканскі суд

Федэральны суддзя ў Вашынгтоне пастанавіў аднавіць на працы супрацоўнікаў радыёстанцыі, звольненых ці адпраўленых у адпачынак.

Фота ўзята з сайта check-point.kz

Суддзя пастанавіў таксама аднавіць фінансаванне радыёстанцый «Радыё Свабодная Азія» і Бліжнеўсходняй вяшчальнай сеткі, якія ўваходзяць у сістэму глабальнага вяшчання ЗША. Ён не разглядаў пытанне«Радыё Свабодная Еўропа / Радыё Свабода», бо гэтая рэдакцыя падала асобны іск.

Іск «Голаса Амерыкі» разгледжаны не па сутнасці, рашэнне прынята ў якасці забяспечвальнай меры (pre­lim­i­nary injunc­tion). Адміністрацыя Трампа можа яго абскардзіць, паведамляе «Настоящее время».

Суддзя Ройс Ламберт, які прыняў рашэнне па іску «Голаса Амерыкі», агулам прыняў да разгляду шэсць іскаў да USAGM, якія падалі медыяарганізацыі і іх супрацоўнікі.

Чаму амерыканскія медыякарпарацыі змагаюцца за сваё выжыванне

14 сакавіка Трамп падпісаў указ, накіраваны на скарачэнне сямі федэральных агенцтваў, у тым ліку Агенцтва глабальных медыя ЗША (USAGM), якое апякуецца «Радыё Свабода/Радыё Свабодная Еўропа (RFE/RL) » і іншымі мэдыярэсурсамі. Ужо на наступны дзень USAGM заявіла аб спыненні гранту для «Радыё Свабодная Еўропа / Радыё Свабода (РСЕ/РС)».

25 сакавіка акруговы суд у Вашынгтоне задаволіў пазоў РСЕ/РС, загадаўшы USAGM перапыніць спробы закрыць медыякарпарацыю.

26 сакавіка USAGM уведаміла «Радыё Свабодная Еўропа / Радыё Свабода», што скасоўвае сваю заяву аб спыненні гранту ад Кангрэсу, выдадзеную 15 сакавіка, але падкрэсліла, што захоўвае за сабой права спыніць выдзяленьне гэтага гранту ў будучыні. USAGM пакуль дакументальна не пацвердзіў аднаўленне грантавага фінансавання.

Як рашэнне Трампа ўдарыла па беларускім медыярынку

Натуральна, прыпыненне дзейнасці амерыканскіх медыякарпарацый ударыла, у тым ліку, і па беларускім медыярынку.

З 1 красавіка Беларуская служба «Радыё Свабода» адправіла частку сваіх супрацоўнікаў у вымушаны адпачынак.

Публікацыяў на свабодаўскіх хвалях істотна паменела. Некаторыя знакавыя праекты — «ПіК Свабоды» на YouTube-канале «Свабода Pre­mi­um» ці «Тлумачым з Гурневічам» на YouTube-канале Радыё Свабода, відэападкасты «Гісторыя на Свабодзе» і «Куды коціцца сьвет» — пастаўленыя на вымушаную паўзу.

У сярэдзіне красавіка спыніў вяшчанне тэлеканал «Настоящее Время. Беларусь», створаны ў свой час RFE/RL пры ўдзеле «Голоса Амерыкі», усе супрацоўнікі беларускай рэдакцыі праекта адпраўлены ў адміністрацыйны адпачынак.

Cur­rent Time Belarus — частка тэлеканала «Настоящее Время», які ў 2023 годзе адмыслова ствараўся для рускамоўнай аўдыторыі з Беларусі. Як тады расказваў у інтэрв’ю БАЖ дырэктар тэлеканала Павел Буторын, перад праектам ставілася задача паведамляць беларусам цікавую і карысную інфармацыю без цэнзуры і абмежаванняў, а таксама распавядаць пра актуальныя праблемы, перш за ўсё ўнутры краіны, але таксама і за яе межамі.

Ютуб-канал тэлеканала прыносіць 8,5 мільёна праглядаў у год, Tik­Tok — больш за 10 мільёнаў. 75 працэнтаў гледачоў глядзяць яго з Беларусі.