Суд вярнуў справу Вячаслава Лазарава на дапрацоўку ў міліцыю

Падзеі, паводле якіх сёння судзілі Вячаслава Лазарава, адбыліся 4 кастрычніка. У той дзень ён асвятляў мірны марш пратэсту ў Віцебску для тэлеканала “Белсат”. Згодна з пратаколам правапарушэння, журналіста-фрылансера абвінавацілі ў тым, што ён, «не маючы акрэдытацыі», размясціў фотаздымкі з акцыі ў тэлеграм-канале “Белсата” і тым самым парушыў заканадаўства аб СМІ. 

Вячаслаў Лазараў тлумачыў суду, што размяшчае фотаздымкі выключна рэдактар, і ніхто іншы не мае такіх паўнамоцтваў. Адвакат падкрэсліваў, што дыспазіцыя артыкула 22.9 КаАП сведчыць пра такія паняткі, як выраб і распаўсюд прадукцыі СМІ, а не размяшчэнне ці апублікаванне.

Вячаслаў Лазараў пацвердзіў, што меў рэдакцыйнай заданне ад тэлеканала «Белсат» на тое, каб асвятляць падзеі пасля прэзідэнцкіх выбараў, але зазначыў, што ў матэрыялах справы няма ніводнага фотаздымка, зробленага ім 4 кастрычніка. Таму няма і падстаў для адміністрацыйнага пакарання.

Да слова, 4 кастрычніка віцебская міліцыя прыклала шмат намаганняў, каб мірнае шэсце журналісты не асвятлялі: яшчэ да пачатку акцыі былі затрыманыя калегі Вячаслава Лазарава з іншых незалежных выданняў. Яму самому ўдалося пазбегнуць затрымання. Праз некалькі дзён у кватэры ягонай маці міліцыянты правялі агляд — шукалі фота- і відэатэхніку, але нічога не знайшлі.

Як стала вядома сёння падчас судовага слухання, пошукі тэхнікі праводзіліся ў межах адміністрацыйнай справы, якую цяпер суд вярнуў на дапрацоўку ў міліцыю.